Уым райсæн ис 70 дæсныйады
Август – ахсджиаг мæй у уæлдæр ахуыргæнæдæттæм чи цæуы æрмæст уыдонæн нæ, фæлæ аустæуукаг ахуырад райсын кæй фæнды, уыдонæн дæр. 19 ахуыргæнæндоны дуæрттæ гом сты абитуриенттæн. Уым райсæн ис 70 дæсныйады. Ацы аз бюджетон бынæттæм бацæудзысты 4 мин адæймаджы. Гæххæттытæ бадæттæн ис 15 августмæ. Бæлвырддæр радзурдзæн Чехойты Фатимæ.
Икъоты Лоренæ йæ фидæны дæсныйад равзарыныл бирæ нæ хъуыды кодта. Чызг йæ сабибонтæй фæстæмæ æмхиц у аивадмæ æмæ йæ фæнды йæ цард уыцы къабазимæ сбæттын. Равзæрста сфæлдыстадон дæсныйад – «Графикон дизайн». Ахуыр та кæндзæн Дзæуджыхъæуы электроникæйы колледжы.
Ацы аз Дзæуджыхъæуы электроникæйы колледжы ис 250 бюджетон бынаты. Сахуыр кæнæн дзы ис 8 дæсныйадыл. Арæхдæр абитуриенттæ равзарынц программировани. Колледжы фæзынд ног дæсныйад – «Интеграция решений с применением технологий искусственного интеллекта». Исынц æм абитуриентты коммерцион бындурыл. Ныридæгæн дæр дæсныйад бирæтæн у цымыдисаг.
Хæххон металлургон техникумы 270 бюджетон бынатмæ сæ гæххæттытæ балæвæрдтой 450 адæймаджы. Иуæй иу дæсныйæдтæм ныридæгæн цæуы конкурсон æвзæрст. Техникумы кусджыты ныхæстæм гæсгæ, фыццаджыдæр ахуырмæ бацæуыны бар ис сæрмагонд æфсæддон операцийы æфсæддонты сывæллæттæн.
Ацы аз бюджетон бынæттæм райсдзысты 4 мин адæймагæй фылдæр. Уыдонæн фадат ис 76 дæсныйадæй равзарын зæрдæмæдзæугæ. Республикæйы ахуырад æмæ наукæйы министрады информацимæ гæсгæ, абитуриенттæн цымыдисаг сты информацион технологитæ, медицинæ æмæ туризм, бирæтæ равзарынц кусæг дæсныйæдтæ дæр.
Абитуриенттæн астæуккаг профессионалон ахуыргæнæдæттæм сæ гæххæттытæ бадæттыны фадат ис 15 августмæ. Студенттæ суæвгæйæ сын фадат фæзындзæн сæ равзæрст дæсныйæдты сусæгдзинæдтæ базонынæн.
