Сæ цыды нысан уыд æргътæ сбæрæг кæнын. УФ-йы президент Владимир Путины бадзырдмæ гæсгæ санкциты фæстæ фæлхасадон продукцийы æргътæ хъуамæ ма фæбæрзонддæр уой. Уымæ гæсгæ ныртæккæ æппæт уæйгæнджыты архайдмæ дæр цæудзæн цæстдард.
Æхсæнон палатæйы уæнгтæ сæ рейд райдыдтой, Алагиры æрæджы цы армукъа байгом, уырдыгæй. Йæ продукци æнæ сæудæджергæнджытæй уæй кæнын кæй фæнды, уыцы фермертæн ам радтой бынæттæ.
Болæтаты Циури уæй кæны, йæ бинонтæ цы халсартæ æрзайын кодтой, уыдон. Куыд зæгъы, афтæмæй сæ армукъайы йæхæдæг кæй уæй кæны, уый йæхицæн дæр, адæмæн дæр пайда у. Уымæн æмæ сты асламдæр.
Алагиры районы æргъты политикæмæ цæст куыд дарынц, уымæй Æхсæнадон палатæйы уæнгтæ баззадысты разыйæ. Куыд сбæрæг кодтой, афтæмæй æмтгæй республикæйы æргътæй сты къаддæр. Уыимæ хорз у продукцийы хæрзхъæддзинад дæр.
Æхсæнадон палатæйы уæнгтæй уæлдай ма, рейды архайдтой Цæгат Ирыстоны хъæууон хæдзарады министрады æмæ Алагиры районы администрацийы минæвæрттæ. Уæвгæ, хойрæгты хæрзхъæддзинадмæ æмæ сæ æргътæм цæст дарыны фарста – сæ бæрны ис.
Къамисы уæнгтæ бабæрæг кодтой Алагиры центрон базар дæр. Ам та уавæр бынтон æндæрхуызон у. Фæстаг мæймæ дзы æргътæ дзæвгар сырæзтысты.
Базармæ бахизæны цур цы дукани ис, уым æргътæ æгæр бæрзонд кæй сты, уый тыххæй фиппаинагимæ дуканигæс разы нæ уыд.
Æхсæнадон палатæйы къамисы уæнгтæн ацы рейд уыд фыццаг. Фæнд кæнынц хойрæгты æргътæ сбæрæг кæнын иннæ районты дæр. Æппæт хатдзæгтæ дæр æрвыст æрцæудзысты Уф-йы æхсæнадон палатæмæ. Æгæр бæрзондыл нымад куы æрцæуой, уæд сæ хатдзæгтæ æрвыст æрцæудзысты монополиты ныхмæ службæмæ.
