филиал вгтрк государственная телерадиовещательная компания “Алания”

Къамисы разамонæг, Хицауды сæрдары хæдивæг Зæнгионты Виталий, фыццаджыдæр, йе ‘ргом аздæхта республикæйы цæттæдзинадмæ æвирхъау уавæрты архайынмæ. Куыд бафиппайдта, афтæмæй, æрæджы цы ахуыртæ ацыдысты, уыдон равдыстой, сæрмагонд службæтæ ифтонг кæй сты нырыккон техникæйæ, адæммæ та кæй ис хъæугæ зонындзинæдтæ æвирхъау цауты фæстиуджытæ аиварс кæнынæн. Зæнгионты Виталий бахæс кодта бынæттон хиуынаффæйады минæвæрттæн – æнгомдæрæй кусын адæмимæ, цæмæй арæхсой алыхуызон фыдбылызты раст архайынмæ.

Боны фæткы сæйрагдæр фарстатæ баст уыдысты, фæлладуадзæн рæстæг кæй æрбахæццæ кæны, уыимæ. Æрдзырдтой, сæрдыгон сывæллæттæ цы лагерьты вæййынц, уыдоны уавæрыл. Хъуамæ дзуапп дæттой æдасдзинады æппæт домæнтæн, цæмæй сывæллæттæ хъахъхъæд уой фыдбылызтæй.

Сæрдыгон хъæдты тæссаг вæййы зынгсирвæзтытæй. Бæрнон ведомствотæ хъæугæ мадзæлттæ кæнынц, цæмæй ахæм фыдбылызтæй хъæдтæ хызт уой.

Къамисы уæнгтæ æрдзырдтой донивылдты рæстæгмæ цæттæдзинадыл. Иудадзыгдæр хъусдард ис цъититы æмæ цæугæдæтты, стæй донивылдтæй тæссаг кæм уыдзæн, уыцы хъæуты, хидты æмæ фæндæгты уавæрмæ.

Доны объекттыл зиантæ кæй æрцæуынц, уымæ гæсгæ донуæтты уавæрмæ уыд стыр æргомздæхт. Æдасдзинады æппæт домæнтæ æххæстгонд кæм сты, ахæм донуæттæ нæ республикæйы ис æрмæстдæр 6.

Зæнгионты Виталий, РЦИ-Аланийы Хицауады сæрдары хæдивæг: «Æрхæццæ кæны фæлладуадзæн рæстæг, æмæ Ирыстон хъуамæ алцæмæй дæр цæттæ уа. Найæн рæстæг æрцæуы, фæлæ нæм бирæ бынæттæ нæй, сывæллæттæ сæхи æдасæй кæм найой. Æмæ бынæттон админситрацитæн, министрадтæн бахæс кодтам, цæмæй сбæлвырд кæной ахæм бынæттæ. Цæмæй дзы уа дохтыр, ирвæзынгæнджытæ, æдасдзинадмæ чи кæса, ахæм адæм».