Уый у рæстæджы домæн. Цæмæй муниципалон æмæ районты дзæбæхгæнæнæдæттæ амæй фæстæмæ уой республикæйы бæрны. Уый фадат ратдзæн æхцатæ ахадгæдæрæй хардз кæнынæн.
Æнæ бындурон цалцæгæй ацы рынчындон кусы йæ тæккæ ногæй фæстæмæ. Арæзт та æрцыд нæуæдз æхсæз азы размæ. Цы кусæнгæрзтæ дзы ис, уыдон сты ивинаг, кæцыдæртыл цæуы æртын азæй фылдæр. Ногæй дзы ис æрмæстдæр рентген-аппарат. Райстой йæ 2007-æм азы. Нузалы районы рынчындон арæзт æрцыд нæ бæстæйы æппæтæй хуссардæр хайы. Йæ фарсмæ – Транскам, Цъæйы хæххон-рекреацион зонæ. Чысыл дарддæр Мызур, стæй Нар. Егъау район у. Нузалы рынчындон лæггад кæны дæсгай хъæутæн. Се хсæн дæрддзæф хæххон пункттæ дæр. Официалон æгъдауæй сæм хауы цыппар мины фондз сæдæ адæймаджы. Стæй ма куы бахъæуа, уæд хæххон курортты фæлладуадзæг адæм дæр. Фæлæ уæддæр ам сфæнд кодтой сæ фæтк рацаразын. Цæмæй лицензии райсой, уый тыххæй фæфылдæр кодтой специалистты. Æмæ уæд лæггæдтæ дæр уыдзысты фылдæр.
Æмбалты Анатолий, Нузалы районы рынчындоны сæйраг дохтыр: 1«Нæ рынчындон тынг ахадгæ куыст кæны, уымæн æмæ ис арæнтыл. Рынчынты нæм ласынц алы рæттæй. Æмæ ма суанг, фæндаггон фыдбылызты хъæгдард чи баййафы, уыдоны дæр».
Бицъоты Мæдинæ, Нузалы районы рынчындоны медицинон хо: «Æрмæст фæндаггон фыдбылызты хъыгдардбаййафджыты нæм нæ ласынц, фæлæ ма лæггад кæнæм иннæ адæмæн дæр. Хорз рынчындон нын у. Ныр та нæ æндæр уавæрты кусын кæнынц. Æрцыд нæм «сокращенитæ». Æмæ ныр суткæмæ баззад иунæг медицинон хо».
Ахæм уынаффæ се ппæты зæрдæмæ нæ фæцыд. Сæ хъуыдымæ гæсгæ уый тæссаг у, рынчындон сæхгæнынæй. Æнæниздзинадхъæхъхъæнынады министрады куыд зæгъынц, афтæмæй уыцы ныхæстæн бындур нæй. Сæ сæйраг нысан у æрмæстдæр рынчындоны куыст фæахадгæдæр кæнын. Уый у рæстæджы домæн. Цæмæй муниципалон æмæ районты дзæбæхгæнæнæдæттæ амæй фæстæмæ уой республикæйы бæрны.
Æнæниздзинадхъæхъхъæнынады министры хæдивæг Реуазты Таймураз куыд зæгъы, афтæмæй уый фадат ратдзæн фæрæзтæ ахадгæдæрæй хардз кæнынæн. Ома муниципалон куыстуатты, æнæмæнг медицинон фæдзæхстады фонды æмæ республикон бюджеты чи ис, уыдон.
Егъау медицинон рацарæзтмæ æнхъæлмæ кæсынц Æрыдоны районы клиникон рынчындоны дæр. Фæнд кæнынц цалдæр районæн лæггад кæнын. Фыццаджыдæр уал травматологийы хайад. Уымæн æмæ ардæм рынчынтæ дзæбæх кæнынмæ цæуынц Дыгуры, Æрæфы, Кировы æмæ æндæр республикæйы иннæ районтæй.
Рацарæзты фæстæ цалдæр муниципалон куыстуаты амæй фæстæмæ фæнд кæнынц фылдæр амбулаторон æмæ поликлиникон æххуыс кæнын. Уый хъæугæдæр у, зæгъынц специалисттæ. Ууыл æрæджы ныхас кодта республикæйы сæргълæууæг дæр районты рынчындæтты сæйраг дохтыртимæ. Мамсыраты Таймураз загъта, рацарæзт æнцонæй нæ цæудзæн, фæлæ æндæр гæнæн нæй. Алы дзæбæхгæнæндон дæр хъуамæ ахадгæ куыст кæна, паддзахадон гарантиты программæмæ гæсгæ. Бирæ хъуыддæгтыл бакусын хъæуы, зæгъы æнæниздзинахъахъхъæнынады министр Владимир Селиванов. Дохтыртыл æмæ æндæр медицинон кусджытыл дзургæйæ та сæйрагдæр у, цæмæй æнæ куыстæй мачи баззайа, уый. Куы бахъæуа, уæд дохтырты ахуыр кæныдзысты ног дæсныйадтыл, ома ивдзысты сæ профиль. Ныртæккæ республикæйы нæ фаг кæнынц анестезиологтæ, реаниматологтæ æмæ неонатологтæ. Уымæн æмæ рынчын адæймаг хъуамæ иса бæлвырд æмбæлгæ æххуыс. Уый у сæйрагдæр.
Фидараты Маринæ
