Фæлæ хъуыддаг нæ ивы. Ныртæккæ горæты 14 стыр бæстыхайы арæзт цæуы, сæ хицæуттæ уыцы куыстытæн бар нæ райстой, афтæмæй. Дзæуджыхъæуы административон техникон
Маркусы æмæ Куйбышевы уынгты тигъыл ацы бæстыхай фæзынд раздæры уæйгæнæн киоскты бынаты. Зæххы хайы хицау Тогуызты Эдуард куыд зæгъы, афтæмæй киоскты уавæр тынг æдзæллагмæ æрцыд, æмæ уымæ гæсгæ нæлгоймаг сæ бынаты райдыдта амайын ног бæстыхай. Эдуард æмбарын кæны, киосктæ йæ зæххы хайæн йе рдæгыл йедтæмæ кæй нæ лæууыдысты. Ныр та ног бæстыхай бацахста зæхх æнæхъæнæй дæр – 47 квадратон метры.
Тогуызты Эдуард: «Ацы зæхх у мæн, ис мæм сæрмагонд гæххæттытæ. Цы киосктæ дзы лæууыд, уыдон дæр мæн уыдысты. Æдзæллаг уавæрмæ куы æрцыдысты, уæд администрацимæ бацыдтæн, цæмæй арæзтадæн бар райсон. Фæлæ уыцы хъуыддаг тынг дæргъвæтин рауад. Нал банхъæлмæ кастæн æмæ йæ амайын райдыдтон».
Ацы бæстыхай дæр æнæзакъонæй амад æрцыд. Куыстытæ цæуынц Уататы Бибойы номыл уынджы. Ацы хъуыддаджы фæдыл сæрмагонд документтæ горæты администраци арвыста Советон районы тæрхондонмæ. Цыфæнды арæзтадæн дæр хъуамæ уа бардæттæг документтæ, стæй хъуамæ конд цæуа Дзæуджыхъæуы пъланмæ гæсгæ, æмбарын кæнынц администрацийы специалисттæ. Ацы объект та, Магкайы фырты æмæ Шмулевичы уынгты тигъыл, сæрмагонд документтæм гæсгæ арæзт æрцыд закъоны домæнтæ хынцгæйæ. Уæвгæ та хъуыддаг бынтон афтæ нæу. Ныртæккæ ацы бæстыхай дæр ис, æнæзакъонæй арæзт чи æрцыд, уыдоны номхыгъды.
Æнæзакъон арæзтадон объекттæ Дзæуджыхъæуы ис 40-æй фылдæр. Уыдонæй егъаудæртæ сты 14. Горæты административон-техникон инспекцийы специалисттæ куыд зæгъынц, афтæмæй сын сæ хицæуттæм æрвыстой сæрмагонд гæххæттытæ, цæмæй арæзтад бауромой. Фæлæ закъон нæ хынцгæйæ бæстыхæйттæ дарддæр арæзтой.
Касаты Руслан, Дзæуджыхъæуы администрацийы административон-техникон инспекцийы специалист-архитектор: «Æнæзакъон арæзтад кæм цæуы, уыцы зæххы хайы хицауы куы сбæрæг кæнæм, уæд ын радтæм рæстæг, цæмæй арæзтад баурома æмæ дарддæр архайа закъонмæ гæсгæ. Фæлæ йæ куы нæ сæххæст кæны, уæд администрацийы барадон хайад бацæттæ кæны сæрмагонд документтæ æмæ сæ арвиты тæрхондомæ».
Дзæуджыхъæуы администрацийы æмбарын кæнынц – фыццаджыдæр хъуамæ адæймагмæ уа, зæххы хай йæхи кæй у, уый æвдисæг гæххæттытæ. Уый фæстæ йæ хъæуы администрацийы райсын горæты арæзтады пълан æмæ уымæ гæсгæ сбæлвырд кæнын, зæххы цавæр бæстыхай саразæн ис, уый. Стæй, бар кæмæн ис проект кæнынæн, ахæм куыстуаты саразын фидæны бæстыхайы проект. Æппæт уыцы документтæ хъæуы администрацимæ бахæссын, цæмæй уым радтой бар арæзтадон куыстытæ кæнынæн.
Хъуысаты Сослан, Дзæуджыхъæуы администрацийы бындурон арæзтады хайады хицау: «Алы зæххы хайæн дæр ис бар, цы дзы ис аразæн, уый. Æмæ адæймаг цалынмæ аразын нæма райдыдта, уæдмæ хъуамæ…».
Æнæзакъон арæзтадтимæ Дзæуджыхъæуы администраци тох кæндзæн дарддæр дæр. Специалисттæ куыд æмбарын кæнынц, афтæмæй уыцы объекттæ æвзæрырдæм фæзынынц горæты æддаг бакастыл. Уыимæ бæстыхæйттæ халынц горæты арæзтады пълан.
Гугкаты Иринæ
