филиал вгтрк государственная телерадиовещательная компания “Алания”

Стыр футболмæ къахдзæф. Æппæтуæрæсеон турнир «Сæрак пурти»-йы горæтаг къæпхæн арæзт цæуы Дзæуджыхъæуы. Æвзонг футболисттæн ацы ерыс у фыццаг ахсджиаг къахдзæф спорты. Æвзарæн турниртæ арæзт æрцыдысты республикæйы районты дæр. Ацы ерысы та архайы 83 командæйы Дзæуджыхъæуы скъолатæй. Командæтæ сæ кармæ гæсгæ дих кæнынц æртæ къордыл. «Сæрак пуртийы»-йы Дзæуджыхъæуккаг къæпхæн фæуыдзæн 25 майы. Уый хатдзæгтæм гæсгæ æвзæрст æрцæудзæн 12 командæйы – фыццаг æмæ дыккаг бынæттæ чи бацахса, уыдон. Ерыс кæндзысты, сæ районты фыццаг бынæттæ чи бацахста, уыцы лæппутимæ. «Сæрак пурти»-йы турниры республикон къæпхæны уæлахздзаутæ Цæгат Ирыстоны кад хъахъхъæндзысты Цæгат Кавказы ерысты.

Джагаты Алан, турниры архайæг: «Ацы турниры мæхæдæг архайын 3-аг хатт. Не скъола дзы алы хатт дæр вæййы, фыццаг бынат райстам, уый æртæ азы размæ. Мæнмæ гæсгæ ахæм турниртæ хъæуынц, цæмæй нæ фæсивæд компьютерты уæлхъус ма бадой, фæлæ иу хъазгæ дæр кæной иуæй-иу хатт. Æмæ мæ зæрдæмæ цæуы».