Æхсызгон у, æхсæнады кæй ис, цæрæгойтæн таригъæд чи кæны æмæ сæ сæхимæ чи райсы, ахæм фæсивæд. Иумæ сæ æрбамбырд кодта Сихъоты Эльвирæ. Ныртæккæ уал сæ къорды ис 10 волонтеры.
Мæй размæ машинæ куыдзы скъуырдта. Ныр Чарли, куыдзыл ахæм ном сæвæрдтой, хъавы йæ къæхтыл слæууын, фæлæ цæфты фæстæ у лæмæгъ. Къæбыла машинæйы бын куы бахауд, уæд æй ссардтой волонтертæ æмæ йæм уæдæй сæ цæст дарынц. Уайтагъд æй аластой дохтыртæм, фæлæ сын уыдон стыр ныфсытæ не вæрдтой. Скодтой йын операци æмæ къæбыла йæ къæхтыл слæууыд.
Диана Будылина, волонтер: «Мæй размæ йæ машинæ куы скъурдта, уæд тынг æвзæр уавæры уыд. Йæ къах уыд саст, схъис ныссагъд йæ астуыстæджы Тæрсгæ дæр куыд нæ фæкодта. Райдианты йæ бон цæуын дæр нæ уыд. Ныртæккæ сабыргай иннæ куыйтимæ æмæ цæрæгойтимæ фæлымæн. Гыццылгай цæуын райдыдта. Тæригъæд ын кодтон æмæ ныууагъдтон мæхимæ. Бон ын кæнæм цалдæр уколы æмæ массажтæ, цæмæй йæ къæхтыл тагъддæр слæууа, уый тыххæй».
Куыдзмæ кæсы волонтер Диана Будылина. Хæдзары ма йæм цæрынц дыууæ куыдзы æмæ гæды. Чарли уайтагъддæр семæ фæлымæн. Уыдон дæр æдзух цæуынц йæ фарсмæ. 3 боны фæстæ ма куыдзæн хъуамæ скæной ноджыдæр иу операци – ацы хатт операци кæндзысты астæуыстæгыл.
Æхсызгон у, æхсæнады кæй ис, цæрæгойтæн таригъæд чи кæны æмæ сæ сæхимæ чи райсы, ахæм фæсивæд. Иумæ сæ æрбамбырд кодта Сихъоты Эльвирæ. Ныртæккæ уал сæ къорды ис 10 волонтеры. Фæлæ се ххуыс кæй хъæуы, уыдон та сты бирæ фылдæр. Æмæ хъæппæрисджын къорды уæнгтæм ис фæнд куыйтæн приют саразын. Ис сæм курдиат дæр, цæмæй сын радих кæной зæхх, кæнæ радтой бæстыхай.
Сихъоты Эльвирæ, волонтер: «Фæндид нæ паддзахадон оргæнты рдыгæй нæм исчи куы фæкæсид, уый. Зæххы хай, кæнæ нын бæстыхай куы радих кæниккой, уæд мах бирæ къæбылатæн æмæ гæдытæн баххуыс кæниккам. Нымад куыд уа муниципалон куыстуатыл. Уæд махæн дæр æнцондæр уаид. Зивæг нæ кæнæм цæрæгойтæм зилын æмæ сæ сыгъдæг кæнын. Кæниккам сын стерилизаци дæр, æмæ уæд бынтон дæр никæмæн уыдзысты тæссаг. Ничиуал сæ тæрсид, стæй цæрæгойтæ сæхæдæг дæр мæстыгæр нæ уаиккой. Ныртæккæ нæ бон цас у, уыйбæрц æххуыс кæнæм, адæймаджы аххосæй хъыгдард чи баййæфта кæнæ чи фæрынчын, уыцы сырдтæн. Базилæм сæм, ссыгъдæг сæ кæнæм. Стерилизаци сын скæнæм. Æмæ сæ хуыз сæхимæ куы рцæуы, уæд сæ адæмæй бирæты бафæнды сæхимæ райсын. Æмæ сæ радтæм. Фæлæ мын хорз фадæттæ куыд уаид, уæн не ххуыс уаид бирæ фылдæр».
Ныртæккæ куыйтæ æмæ гæдытæм кæсынц æмæ зилын хи фæрæзтæй. Кæмæн куыд йæ бон у, афтæмæй сæм фæкæсынц сæ зонгæтæ, æмæ цæрæгойтæн тæригъæд чи кæны, уыдон дæр. Фæлæ уый бирæ фаг нæ кæны. Волонтерты къорд Дзæуджыхъæуы администрацимæ ныффыста курдиат. Æмбырд кæнынц, сæ фарс чи у, уыцы адæмы къухфыстытæ дæр.
Æмæ чи зоны хæстæгдæр рæстæг Дзæуджыхъæуы фæзындзæн ног приют – æххуыс кæй хъæуы, уыцы цæрæгойтæн.
Зыхъуаты Жаннæ
