Фарон районтæн радих кодтой тагъд æххусы ног машинæтæ. Дыгургомы, Дзынагъайы та байгом фельдшерон-акушерон пункт. Ахæм хорзæхмæ ацы аз æнхъæлмæ кæсныц Толдзгуыны дæр.
Багъраты Светланæ дзуры, æрæджыйы онг цы уавæрты куыста, уый тыххæй. Зæронд медицинон кусæнуатмæ асинтæ дæр уыдысты тæссаг.
Медицинон лæггæдты æнцонвадат фарстатæ алы адæймагæн дæр сты бæрнон æмæ ахсджиаг
Æнцонвадат акушерон-фельдшерон пункт Дзинагъайы байгом æрæджы – фарон сентябры. Сарæзтой йæ æппæт нырыккон домæнтæм гæсгæ, скодтой ма дзы пандус дæр.
Райдзаст хъарм бæстыхайы ис æппæт уавæртæ. Ифтонг у хъæугæ медицинон кусæнгæрзтæй.
Багъраты Светланæ, Фельдшер: «Ай у «Смотровой», ай мæхи фельдшеры уат. Ам кæсын рынчынтæм. Уый та нын у стерилизаци кæнæн, уым нæм ис процедурон кабинет. Ис нæм ног кусæнгæрзтæ. Ис нæм алцы дæр».
Дзинагъайы цæры 70 адæймагæй фылдæр. Се ппæт дæр медицинон лæггад райсынмæ цæуынц фельшерон-медицинон пунктмæ. Æмæ, кæй зæгъын æй хъæуы, ног бæстыхай сын удæнцойдзинад у.
Едзиты Зæринæ, Дзынагъайы цæрæг: «Зæронд æфсин мын ис – 91 азы йыл цæуы. Æмæ уæртæ зæронд амбулатори, уæд амбулатори хуынд, тынг ныззæронд ис, схизæн дæр дзы нал уыд. Ныр та нын скодтой рæсугъд, райдзаст ФАП. Æмæ кæд зæронд ус у, уæддæр æй ардæм дæр ис æрхонæн. «Ходуноктыл» цæуы æмæ йæ ардæм дæр æрхонæм иуæй- иу хатт».
Ног фельдшерон-акушерон пунктмæ æнхъæлмæ кæсынц Толдзгуыны цæрджытæ дæр. Зæронд ныккæлæддзаг, æмæ у тæссаг.
Будайты Гетæ,Толдзгуыны цæрæг: «Ахæм агъуыст куы уа хъæуы, уæд уый тынг хорз у. Районы центрмæ цæугæйæ дæр тыхстыстæм, фæндагыл уыд афтæ дæр, æмæ адæймаг рынчындонмæ нæ бахæццæ. Æмæ хорз у ацы арæзтад».
Толдзгуыны цæры 30 адæймагæй фылдæр. Се нæниздзинадмæ цæст дары бынæттон фельдшер Дзансолты Ритæ. Йæ зæрдæ дары, ног медицинон пунктимæ йын æнцондæр кæй уыдзæн, ууыл.
Дзансолты Ритæ, фельдшер: «Кæд нæм зæгъын дохтыртæ дæр фылдæр уа, дæндæгты дохтыр арæх фæхъæуы. Æндæр хъæутæм цæуынц, иунæг дæндагы тыххæй Цыколамæ фæцæуы, æмæ йæ рæстæг фæсафы. Дæндаджы рыстæн арс дæр нæ быхсы».
Ног фельдшерон-акушерон пункт Толдзгуыны аразын райдыдтой фарон ноябры. Ацы аз хъуамæ эксплуатацимæ лæвæрд æрцæуа. Ахæм хорзæхмæ нырма æнхъæлмæ кæсынц республикæйы бирæ хъæутæ. Ныфс та сын бавæрдта Уæрæсейы президенты ныстуан.
Фарон Æрæфы районæн радих кодтой 7 машинæйы. 4-тагъд æххуысы, 3 та Нивæтæ. Уыдонæй иу лæггад кæны хохы цæрæг адæмæн. Фæлæ ма сæ Уæрæсейы президенты ныстуаны фæстæ ныфс ис, ноджы фылдæр транспорт кæй райсдзысты, стæй ма арæзт кæй æрцæудзæн медицинон пункт дæр, уымæй.
Моргуаты Ладæ
