Стендтыл фенæн уыди цæгатирыстойнаг æрмдæсныты куыстытæ. Костюмы дизайн, хæринаг кæныны аивад, хъæдæй æмæ æфсæйнагæй конд дзаумæттæ. Се ппæты дæр уыди национ æууæлтæ.
Чемпионат байгом кодта республикæйы вице-премьер Челæхсаты Рустем. Ерысты сæ арæхстдзинад æвдисынц 14 регионы иугонд командæтæ, се хсæн Хуссар Ирыстоны, Германийы æмæ Финляндийы минæвæрттæ. Фæсивæд ерыс кæнынц 18 дæсныйадмæ гæсгæ. Æрыдоны колледжы бындурыл ацы турнир скæнынæн бацæттæ кодтой æппæт уавæртæ æмæ фадæттæ. Чемпионат «Уолд-Скилс Раша» у иттæг хорз ахуырадон фæрæз. Йæ сæйрагдæр хæс у, æхсæнадмæ бахæццæ кæнын ныртæккæ хи къухтæй исты аразын пайда кæй у, уый, адæймаг æгуыст никуы уыдзæн.
Цæгат Кавказы чемпионаты чи рамбула, уыдон уый фæстæ сæхи фæлвардзысты æппæтуæрæснон къæпхæныл. Фæллойы дæсныйадты чемпионат цæудзæн 4 боны. Эксперттæ хъуамæ равзарой хуыздæрты, стæй рæзгæ фæлтæры сахуыр кæной сæйрагдæрыл – уарзын æмæ аргъ кæнын сæ куыстæн.
