Куыд ма уын æй хъусын кодтам, афтæмæй æрæджы республикæйы сæргълæууæджы премитæ райстой æрыгон ахуыргæндтæ.
Топографион картæтæ кæнæ космосæй ист хуызистытæй чысыл къамтæ скæнын раздæр никæйы бон уыд. Фæлæ æрыгон ахуыргонд Екатерина Соколова цы ног формат æрхъуыды кодта, уый руаджы ныр ахæм гæнæнтæ ис. Ацы хуыз хъахъхъæд цæуы патентæй. Æмæ йæ видеоцæстарды системæйы куы пайда кæной, уæд суаид коммерцион продукт.
Екатерина Соколова, теоретикон информатикæйы институты программист: «Мах райсæм цыфæнды аэрокосмикон къам дæр, æмæ йæ ног форматы скæнæм. Кæд фæкъаддæр вæййы, уæддæр йæ хæрзхъæддзинад вæййы иттæг хорз».
Хицæн ныхасы аккаг у Дзæуджыхъæуы технологон центры инновацион лаборатори. Ам бирæ азты дæргъы Давид Самканашвили куыста микроканалон пластинæты структурæ фæхуыздæр кæныныл. Уыдонæй пайда кæнынц аэрокосмикон техникæйы, эксперименталон физикæйы æмæ медицинæйы.
Давид Самканашвили, начальник научно-инновационной службы ООО Владикавказский научный центр «Баспик»: «На границе световодов создали дополнительный каркас, который позволил улучшить механические свойства пластины».
Микроканалон пластинæ згъæрæхцайæ стырдæр нæу. Зын бауырнæн у, фæлæ йыл электрон каналтæ ис милуанæй фылдæр. Æмæ уый фæрцы фæхуыздæр сты пластинæйы механикон æууæлтæ. Ацы æрхъуыдыгонд ногдзинад банымадтой æппæтуæрæсеон конкурсы дæр. Æмæ Давид Самканашвили сси афæдзы хуыздæр инженер.
Хъулаты Сослан, Дзæуджыхъæуы технологон центр «Баспик»-ы генералон директор: «Иу пластинæйы аргъ у сæдæ фæндзай доллары. Уыимæ сты хуыздæр æмæ нырыккондæр. Сæ аргъ кæд чысыл фылдæр у, уæддæр сæ ахадындзинад дзæвгар хуыздæр. Ныртæккæ исæм бирæ заказтæ. Инновацион куыстуæтты ацы пластинæтæ сты æнæмæнг хъæугæ».
Екатерина Соколова дарддæр кусы йæ метод фæнырыккондæр кæныныл, Давид Самканашвили та архайы ног проекттыл. Дыууæ æрыгон ахуыргонды дæр систы Цæгат Ирыстоны Сæргълæууæджы премийы лауреаттæ. Куыд зæгъынц, афтæмæй сын уый фадат ратдзæн ног æнтыстытæм. Сæ къухы кæй бафтдзысты, уый та дызæрдыггаг нæу.
