Цæгатирыстойнаг æвзонг дирижер Тедеты Хетæджы зонынц канд Ирыстоны нæ, фæлæ Уæрæсейы дæр. Бирæ конкурсты æмæ аивадон олимпиадæты уæлахиздзауыл сæ цæст æрæвæрдтой
Цæгатирыстойнаг æвзонг дирижер Тедеты Хетæг разамынд дæтты мæскуыйаг оркестрæн. Дæсныйадæвдисæг ахуырты – маэстро Юрий Симонов. Ацы культурон цау уыд сæрды Петр Чайковскийы залы. Ахæм егъау мадзалы Хетæг фыццаг хатт архайдта æмæ Юрий Симоновы ныхæстæм гæсгæ лæппу у стыр курдиаты хицау, æмæ цæмæй дарддæр рæза, уый тыххæй йæм хъæуы фæкæсын. Сæрды ма Тедеты Хетæг архайдта Мстислав Ростроповичы фонды стипендиатты концерты.
Тедеты Хетæг, Хуссар Ирыстоны сгуыхт артист, Дзæуджыхъæуы аивæдты колледжы 3-æм курсы студент: «Ацы мастер класс тынг хорз хъуыддаг у. бирæтимæ дзы базонгæ дæн, бирæты базыдтон. Ног зонындзинæдтæ дæр нын радтой, бацамыдтой. Æмæ ныр зонын цы кусон æмæ кæдæм тырнон, уый».
Ныр ма уал Хетæг ахуыр кæны Гергиты Валерийы номыл аивæдты колледжы. Йæ къухы алыхуызон конкурсты цы уæлахизтæ бафтыд, уыдонæй стыр бузныг у йæ ахуыргæнæг æмæ фыццаг æххуысгæнæг Хосроты Тамерланæй.
Хосроты Тамерлан, УФ-йы композиторты цæдисы уæнг, РЦИ-Аланийы аивæдты сгуыхт архайæг: «Ныртæккæ дæр йæ кармæ гæсгæ Хетæджы зонындзинæдтæ хорз сты. У бирæ олимпиадæты æмæ конкурсты уæлахиздзау. Кæсы бирæ алыхуызон литературæ, йæхиуыл кусы, архайы… 17 азмæ йын цы бантыст, уый бирæтæн нæ рауайы. Куыд æй зонын, уымæ гæсгæ йæ арæхстдзинады фæрцы йын бирæ бантысдзæн».
Ныртæккæ Хетæг йæхи цæттæ кæны радон фестивальтæм Бакуйы æмæ Амерычы. Ростроповичы стидендиатты концерты йыл йæ цæст æрæвæрдта зындгонд виолончелисты чызг æмæ йæ фæхуыдта фæсарæнтæм.
Зыхъуаты Жаннæ
