филиал вгтрк государственная телерадиовещательная компания “Алания”

Æцæг хæлардзинады тыххæй аргъау феныны фадат фæци нæ республикæйы сабитæн. Цæгат Ирыстоны театрмæ гастрольты ссыдысты бакуйаг артисттæ. Аивадуарзджыты размæ рахастой спектакль «Тук Тук Ханум». Дзуры царды æнæмæнг хъæугæ хабæрттыл. Æмæ сæм рæзгæ фæлтæры хъæуы сабибонтæй фæстæмæ æмхиц кæнын. Цымыдисаг премьерæйы тыххæй радзурдзæн Фидараты Маринæ.

Ирон театры сценæйы – азербайджайнаг пьесæ. Сывæллæтты спектакль, фæлæ дзы ис арф хъуыды æвæрд. Абдулла Шанг у зындгонд мастер, иу æмæ дыууæ сценарийы нæ ныффыста. Ацы хатт дæр ын, йæ хъуыдыты фæрцы бантыст кæстæрты зæрдæмæ фæндаг ссарын. Спектаклы сæйраг хъайтар у хъæндил. Фæлæ йæхи нымайы уæларвон стъалыйыл. Йæхицæн агуры æмбæлтты. Уыдон ын хъуамæ кæной æгæрон аргъ.

Спектакль федтой нæ республикæйы сидзæр сывæллæтты хъомылгæнинæгтæ æмæ Дзæуджыхъæуы фæкæсынхъуаг бинонтæй сабитæ. Уæвгæ та спектакль цæуы ныр 12 азы. Бирæ хæттыты йæ равдыстой Бакуйы æмæ Дербенты театрдзаутæн. Ныр та ма сыл бафтыдтой цæгатирыстойнаг сценæ дæр. Хæлардзинадыл дзурæг пьесæ ахсджиаг куыд нæ у?

Артисттæ зæгъынц, нæ республикæмæ ссæуынмæ рагæй бæллыдысты. Бахъуыд сæ 10 репетицийы, цæмæй сæ текст иттæг хорз æмбæрстгонд æрцæуа, уый тыххæй.

Ацы мæй та Тæбæхсæуты Балойы номыл Ирон академион театры артисттæ ацæудзысты Бакумæ. Уым архайдзысты сывæллæтты спектальты æппæтадæмон фестивалы. Зæгъын хъæуы уый, æмæ Цæгат Ирыстон уыдзæн иунæг регион, Уæрæсейы номæй чи архайдзæн, ахæм. Адæмы размæ рахæсдзысты спектакль «Вовкæ диссæгты бæстæйы».