филиал вгтрк государственная телерадиовещательная компания “Алания”

Кавказ иртасæг ахуыргæндтæ, æнæкоммерцион куыстгæнæг организациты минæвæрттæ бабæрæг кодтой гуырдзиаг скъола. Ахуыргæнджытæ æмæ скъоладзаутæ уазджытæн «æгасцуай» загътой 4 æвзагыл: сæ мадæлон æвзагæй уæлдай ма ахуырдзаутæ ахуыр кæнынц ирон, уырыссаг æмæ англисаг æвзæгтæ. Базонгæ сæ кодтой се сгуыхтдзинæдтимæ, сæ куыстимæ, сæ ахуырадон нысантимæ. Сколайы директор куыд загъта, афтæмæй сæ ахуыргæнæндонæй цæуы алывæрсыг æххуыс.

Зæгъын хъæуы уый дæр, æмæ Дзæуджыхъæуы бирæ азты кусы гуырдзиаг культурæйы артдзæст, национ æхсæнад «Эртоба». Ныртæккæ йæ уæнгтæ сты 10 000 адæймагæй фылдæр.

Фæстæдæр делегацийы минæвæрттæ бабæрæг кодтой Цæгат Ирыстоны социалон æмæ гуманитарон иртæстыты институт. Фембæлдысты Дзæуджыхъæуы зонадон интеллигенциимæ. Се ‘хсæн рауад ахадгæ æмæ бæстон ныхас. Гуырдзыстоны ахуыргæндтæ куыд загътой, афтæмæй сæ фæнды, цæмæй ирон-гуырдзиаг бастдзинæдтæ кæной фидардæр. «90-æм азты цы цаутæ цыдысты, уыдон Гуырдзыстоны адæмы цæстæнгас не ‘вдисынц. Хицæн адæймæгтæ цы загъдкъахæн митæ арæзтой, уыдон хъуамæ ма фæбæрæг уой, рагæй лымæнæй чи цард, уыцы 2 адæмыхаттыл. Гуырдзыйы хицауад аивта, æмæ нæ хъæуы ног цард аразын» – загъта делегацийы уæнг Шота Апхаидзе.