Уый тыххæй дзырдтой ахуырады æмæ наукæйы коллегийы хатдзæгтæгæнæн æмбырды. Фарон декабрæй фæстæмæ фæфылдæр сывæллæтты рæвдауæндæтты кусджыты мызд дæр.
Сси 11 мины бæрц. 2012-æм азы республикæйы рæвдауæндæтты фæзынд уæлæмхасæн бынæттæ, фæлæ ма уæддæр рады лæууы 12 мин сывæллонæй фылдæр. Ивгъуыд аз скъолатæ хъæугæ кусæн æрмæджытæй сæххæст кæнынæн дихгонд æрцыд 470 милуан сомæй фылдæр. Уыцы фæрæзтæй балхæдтой компьютерон техникæ, ахуырадон-практикон æрмæджытæ, сцалцæг кодтой скъолатæ. Ахуыргæнджыты зонындзинæдтæ фылдæр кæнынæн схардз кодтой 15 милуан сомы бæрц. Ахуырады æмæ наукæйы министры фыццаг хæдивæг Тотраты Владислав куыд загъта, афтæмæй ног ахуыры аз скъоладзаутæн чингуытæ дæтдзысты лæвар. Ацы хъуыддагæй федералон æмæ республикон бюджеттæй радих кæндзысты 170 милуан сомæй фылдæр. Æмтгæй райсгæйæ 2012-æм азы хатдзæгтæ сты зæрдæмæдзæугæ, загътой коллегийы уæнгтæ. Абон ма 3 ахуыргæнæгæн лæвæрд æрцыд «Цæгат Ирыстоны сгуыхт ахуыргæнæджы кадджын ном». Паддзахадон хæрзиуджытæ сын радта министр Огъуаты Алан.
Бабочиты Валентинæ, РЦИ-Аланийы сгуыхт ахуыргæнæг: «Ис мын бирæ скъоладзаутæ. Сæ фæрцы æз цæрын ацы зæххыл. Зын уавæры куы вæййын, уæд мæ зæрдыл куы æрбалæууынц, уæд мын стыр ныфс фæдæттынц. Уыдоны фæрцы æз ацы бон ацы хæрзиуæг райстон, æмæ сын кæнын стыр арфæ».
