Ног инвестицион проект царды уадзы компани Санкт-Петербургæй
2022-æм азы февралы райдиан нысан кæнынц завод «Кристалл»-ы архайд сног кæнын. Ног инвестицион проект царды уадзы компани Санкт-Петербургæй. Заводы территори бабæрæг кодта республикæйы Сæргълæууæджы хæстæ рæстæгмæ æххæстгæнæг Сергей Меняйло. Ныртæккæ фæзуатмæ зилынц, ласынц бырæттæ. Ног хицау аразы технологон процесс. Куыстуаты архайд æрлæууыд 2012-æм азы. Раздæр та дзы 50 азмæ хæстæг арæзта æрхуы, хром æмæ никелы æмтады хуызтæ, æмæ дзы пайда кодтой промышленносты алы къабæзты. Бæлвырддæр та – хъахъхъæнынады атомон æмæ гæрзæгтæ аразыны къабæзты. Заводы территори у 16 гектары. Нысан дзы кæнынц иттæг сыгъдæг æрхуы аразын, стæй ма æндæр проекттæ дæр. Профилон ведомствойы куыд загътой, афтæмæй куыстуатмæ се ргом раздæхтой инвестортæ. Фидæны ратдзæн куысты бынæттæ æмæ хъалонтæ бюджетмæ.
