Цæгат Ирыстоны программæ куыд æххæстгонд цæуы, уымæ сæ цæст дарынц Адæмон фронты минæвæрттæ
Иу фæлтæрæй ахуыр кæнын, стæй æдас уавæрты. Уæрæсейы хицауады уынаффæмæ гæсгæ 2025-æм азмæ хъуамæ нæ бæстæйы æппæт скъоладзаутæ ахуыр кæной иу фæлтæрæй. Уымæй дарддæр, ахуыргæнæндонæн йæ 50% кæлæддзаг куы уа, уæд скъоладзауты раивдзысты ног бæстыхæйттæм. Цæгат Ирыстоны программæ куыд æххæстгонд цæуы, уымæ сæ цæст дарынц Адæмон фронты минæвæрттæ. Активистты кусæг балцы тыххæй бæстондæр радзурдзæн Фидараты Маринæ.
Ног домæнтæм гæсгæ скъоладзаутæ дыккаг фæлтæрæй хъуамæ мауал ахуыр кæной. Уый фæдыл Адæмон фронты специалисттæ мониторинг кæнынц Дзæуджыхъæуы скъолаты. Уымæн æмæ æрмæстдæр горæты баззадысты ахæм ахуыргæнæндæттæ.
Æдæппæтæй Дзæуджыхъæуы дыккаг фæлтæрæй ахуыр кæнынц 4 скъолайы: 5-æм, 50-йæм, 3-æм æмæ 30-æм. Кæцыдæрты дзы бынат бынтон нæ фаг кæны. Зæгъæм пъадвалы уыцы-иу рæстæг æрбынат кодта хæрæндон дæр. Ахæм уавæртæн ис бæлвырд аххосæгтæ, фæлæ директортæн сæ бон у ивддзинæдтæ бахæссын. Зæгъæм, 3-æм скъолайы сæ бон у ног корпусы сæрмæ ноджыдæр иу уæладзыг самайын.
Цæмæй уыцы нысантæ сæххæст кæной, уый тыххæй сын хъуамæ баххуыс кæной паддзахадон æмæ муниципалон программæтæ.
Адæмон фронты хæстæм хауы канд мониторинг кæнын нæ, фæлæ ма фарста паддзахадон структурæты раз æрæвæрын дæр.
Дзæуджыхъæуы 3-æм скъолайы уавæр карздæр кæны уый, æмæ бæстыхай горæты астæу кæй ис. Уый та ууыл дзурæг у, æмæ бæстыхай фæфылдæр кæныны фадат нæй. Фæлæ активисттæ зæгъынц, Дзæуджыхъæуы администрацийæн бацамондзысты æппæт варианттæ дæр. Кæд гæнæн уа, уæд ын суанг балхæнын кæндзысты сыхаг зæххы хай.
