Æрыгон хæстоны схорзæхджын кодтой Суворовы майданæй, Украинæйы гæрзифтонг тыхты командæгæнæн пункт хæлд кæй æрцыд, уый тыххæй
Æмбæлгæ дæнцæг рæзгæ фæлтæрæн. 22-аздзыд Дарчиты Георгий нæ хъуыдыгæнгæйæ балæууыд Фыдыбæстæ хъахъхъæнынмæ. Æрыгон хæстоны схорзæхджын кодтой Суворовы майданæй, Украинæйы гæрзифтонг тыхты командæгæнæн пункт хæлд кæй æрцыд, уый тыххæй. Ныфсхаст, рæстдзæвин æмæ æгъдауджын уæвын Георгийæн йæ туджы ис. Бæлвырддæр радзурдзæн Хъайтмазты Дзерассæ.
Ацы кадртæ Дарчиты бинонты архивы сты æцæг хæзна. Сæ фырт сæрæгасæй æрыздæхт сæхимæ. Сæрмагонд æфсæддон операцийы зонæйы Георгий фæцис 5 мæйы. Уыцы рæстæг фаг уыд, цæмæй йæ фæлтæрдджын хæстон хæлæртты *хсæн æмбæлгæ бынат бацахса, уымæн.
Иумæйаг уæлахизмæ цы æвæрæн бахаста, уымæн аргъ скодтой паддзахадон æмвæзадыл дæр. Георгийы риуыл хуымæтæг хæрзиуæг нæй – Суворовы майдан.
22-аздзыд Георгийы цæстæнгас раздæры хуызæн никуы уыдзæн. Фронты цы рæстæг арвыста, уый æдзух ныр йæ хъуыдыты ис. Фæлæ уæддæр йæ цæсгомыл мидбылхудт.
Дарчиты бинонты ис фæлтæрты бастдзинад. Уæлдай æнгом у Георгий æмæ йæ фыдыфыды *хсæн. Уый у хæсты сывæллон. Уымæ гæсгæ кæстæрты хъомыл кæны патриотизмы бындуртыл. Георгийы мад куыд зæгъы, афтæмæй йæ фырты уды фидардзинад æмæ уæззау зондахаст сты бинонты хистæры фæрцы.
Хæстонты сгуыхтдзинад тохы быдыры у сæ бинонты сæрыстырдзинад. Цалынмæ уыдон уым Фыдыбæстæйы сæрвæлтау тох кæнынц, уæдмæ ам сæ дæнцæгыл хъомыл кæнынц рæзгæ фæлтæры. Æфсæддонты æдзух æрбахонынц скъолатæм алыхуызон мадзæлттæм. Дарчиты Георгий дæр ахæм фембылдтыты арæх вæййы уазæг. Сывæллæттæн фæдзуры йæ царды фæлтæрддзинады тыххæй.
