Цæгат Ирыстонæй дзы архайдта 2 сфæлдыстадон къорды – Культурæйы колледжы æмæ Хæххон аграрон паддзахадон университеты биотехнологийы æмæ стандартизацийы факультеты ансамбль «Нартæ».
Сочийы фестиваль «Сыгъзæрин дельфин» байгом кодта ансамбль «Нартæ» национ кæфтытæй попуррийæ. Ахæм бар сын лæвæрд æрцыд, 2010-æм азы сфæлдыстадон форумы гран-при кæй рамбылдтой, уымæ гæсгæ. Уыцы æнтыстдзинад сæ къухы бафтыд ныр дæр. Фыццаг къæпхæны 3 дипломы номинациты «Регионалон программæ», «Адæмон хореографи» æмæ «Инструменталон цагъд», стæй фестивалы сæйраг приз. Уæлахиздзауты хсæн ис ансамблы фæндырдзæгъдæг Дулаты Тугъан дæр. Æлборты Феликсы композици кинонывмæ «Ах, любовь» арф бахъардта се `ппæты зæрдæтæм дæр.
Дулаты Тугъан, ансамбль «Нартæ»-йы архайæг: «Ацы фестивалы архайд нын тынг пайдайаг уыд. Уым базыдтам иннæ адæмты культурæ. Ссардтам ног æмбæлттæ æмæ, кæй зæгъын æй хъæуы, нæхи дæр равдыстам».
Сочийы Биазырты Хетæг фыццаг хатт рацыд стыр сценæмæ. Куыд зæгъы, афтæмæй фестивальмæ сæхи рагæй цæттæ кодтой. Конкурсон программæйы «Нартæ» акодтой 3 кафты – «Симд», «Хохаг» æмæ «Чызджыты кафт». Уымæй уæлдай ма аивадуарзджытæн балæвар кодтой ноджыдæр 2 кафты.
Биазырты Хетæг, ансамбль «Нартæ»-йы архайæг: «Тынг нæ зæрдæмæ фæцыдис. Уыд дзы бирæ ансамбльтæ. Равдыстой рæсугъд кæфтытæ. Сочийы цæрджытæн тынг сæ зæрдæмæ фæцыд, мах куыд ракафыдыстæм, уый».
Ансамбль «Нартæ» хæххон паддзахадон аграрон университеты биотехнологийы æмæ стандартизацийы факультеты бындурыл архайы 7 азы. Йæ саразыны хъуыды æрцыд факультеты декан Цъугкиты Барисмæ. Уыцы хъæппæрис хорзыл банымадта университеты разамынд дæр.
Цъугкиты Барис, хæххон паддзахадон аграрон университеты биотехнологийы æмæ стандартизацийы факультеты декан: «Цæмæй студенттæ сæхи æвзæр хъуыддæгтæй хизой, ууыл архайæм, уый тыххæй скодтам хор дæр, стæй кафджыты ансамбль дæр».
«Нартæ» аграрон университеты у иунæг факультетон ансамбль. Æрвылаз фæхъахъхъæны факультеты кад фестиваль «Студентон уалдзæджы». Стыр æнтыстдзинæдтæ йæ къухы бафты уæрæсеон æмæ æппæтадæмон конкурсты дæр. Уымæн æвдисæн сты ансамблы бирæ хæрзиуджытæ.
Æрыгон ансамблæн ис йæхи костюмерон. Алы кафтæн дæр хицæн уæлæдарæс. Уымæй уæлдай ма цæттæ сты костюмтæ фидæны номертæн дæр. Æдæппæтæй ам ис комплекттæ 15 кафтæн.
Абон ансамблы кафы 40 адæймаджы. Йæ репертуары ис 8 кафты. Национ хореографийы сусæгдзинæдтæ фидæны биотехнологтæн амоны Къорнаты Таймураз. Йæхæдæг дæр ацы факультеты рауагъдон у. Ныртæккæ къорд цæттæ кæны, фольклорон фестиваль «Золотой Карагез»-ы архайынмæ. Уыдзæн июны кæрон Турчы.
Хъайтмазты Дзерассæ
