Зындгонд аркиткон капитан ихсæттæн нау «Арктика»-йыл фыццаг бахæццæ Цæгатаг полюсмæ
28-æм августы 100 азы æххæст кæны Социалистон фæллойы хъæбатыр Кучиты Юрийы райгуырдыл. Зындгонд аркиткон капитан ихсæттæн нау «Арктика»-йыл фыццаг бахæццæ Цæгатаг полюсмæ. Нæ зындгонд æмзæххоны 100 азы бонмæ, кæм царди, уым Коцойты Арсены уынджы байгом кæндзысты цыртдзæвæн. Кучиты Юрийы 100 азы боны мадзæлттыл бæстон æрныхас кодтой организацион комитеты æмбырды. Амыдта йæ хицауады сæрдары хæдивæг Азымты Иринæ. Архивон службæ цæттæ кæны виртуалон равдысты проект «Родовые истоки арктического капитана Юрия Кучиева». Ног ахуыры азы райдианæй республикæйы скъолаты арæзт æрцæудзысты лæгдзинады уроктæ. Скъоладзаутæн равдисдзысты презентацитæ æмæ видеороликтæ. Се ппæт дæр баст уыдзысты легендарон полярон иртасæджы цардвæндагимæ. Цымыдисаг мадзæлттæ арæзт æрцæудзысты Дзæуджыхъæуы библиотекæйы системæйы дæр. Чингуыты иллюстрацигонд равдыстытæ: «Земля, названная его именем», «Арктический джигит» æмæ «Горный орел». Мамсыраты Дæбейы номыл сывæллæтты библиотекæйы уыдзæн Блиновы чиныджы презентаци «Последний романтик», стæй Санаты Владимиры чиныгмæ гæсгæ конференци «Арктический джигит» æмæ тематикон презентаци «Покоритель ледяного безмолвия». Сывæллæтты сфæлдыстады республикон галуаны байгом уыдзæн информацион равдыст «Кучиты Юрий – адæймаг легендæ». Цæгат Ирыстоны фæсивæды хъуыддæгты комитеты хъæппæрисæй та арæзт æрцæудзысты тематикон лекцитæ æмæ викторинæтæ æфсæддон-спортивон лагерь «Балц»-ы æмæ бæстæзонæн-туристон лагкрь «Хохаджы». Дзæуджыхъæуы администраци та горæт уынгты рапарахат кæндзæн тематикон баннертæ æмæ саив кæндзæн, легендарон капитаны цыртдзæвæны бынаты алфамблай. Уыдзæн бирæ æндæр цымыдисаг мадзæлттæ.
