Сæ арæхстдзинад дзы равдыстой Цæгат Ирыстоны минæвæрттæ дæр. Алагиры районы сывæллæтты сфæлдыстады хæдзары 2 хъомылгæнинаджы Уæрæсейы кад хъахъхъæдтой бæстæйы
Хæдтæхæджы ахæм базырты фæрцы аппарат рæвдздæр стæхдзæн хæрдмæ, стæй фылдæр тæхдзæн уæлдæфы, зæгъы Реуазты Максим. Цæгатирыстойнаг авиамоделисттæ ахæм технологийæ нæма пайда кæнынц. Максим æдзухдæр кусы алыхуызон ног проекттыл. Йæ хъуыдымæ гæсгæ, æрмæст афтæмæй ис ацы спорты стыр бæрзæндтæм схизæн. Авиамоделтæ аразыны хъуыддаджы лæппу фыццаг къахдзæфтæ акодта 4-æм къласы ахуыргæнгæйæ республикæйы сфæлдыстадон къордты. 2007-æм азы сси Европæйы чемпион. Ныр та у Мæскуыйы авиацион институты студент.
Реуазты Максим: «Мемæ чи ахуыр кæны, уыдонæн скъолаты фæстæ бацыдысты, нæй сæм сæрмагонд зонындзинæдтæ. Æз та ардыгæй рацыдтæн, зонын тæхæджы хæйттæ, куыд арæзт у. уыдонæн та зындæр у».
Авиамоделтæ кæнын у цымыдисаг, фæлæ зынархайд. Хъæуы зонындзинæдтæ математикæйæ, физикæйæ, сæрмагондæй та – аэродинамикæйæ. Хæдтæхджытæ аразгæйæ фæпайда кæнынц рог æрмæджытæй. Зæгъæм, бальзæйæ, углепластикæй, дюралюминийæ. Иу модель бацæттæ кæныныл бахардз вæййы иу мæйæ цалдæр азы онг.
Авиамодельты спортæн республикæйы стыр фидæн ис. Ууыл дзурæг сты æрыгон авиамоделистты æнтыстдзинæдтæ. 3 къуырийы размæ Румынийы цы дунеон чемпионат уыд, уым Уæрæсейы иугонд командæйы хыгъды уыдис Алагиры районы сывæллæтты сфæлдыстады хæдзары 2 хъомылгæнинаджы – Александр Кузнецов æмæ Мамытты Сæрмæт. Сæ арæхстдзинад æвдыстой таймерон модельтæ F1P классы. 20 спортсмены хсæн Александр сси фыццаг. Сæрмæтæн уæлахиздзау суæвын йæ къухы нæ бафтыд, фæлæ йе мбалы æнтыстдзинадыл тынг бацин кодта.
Мамытты Сæрмæт: «Æз фарæстæм стæм. Фæстаг туры мын нæ рауад атæхын. Куы рауадаид, уæд Сашæимæ фыццаг бынатыл тох кодтаиккам. Фæлæ нæ рауад æмæ фарæстæм бынатмæ æрхаудтæн».
Æмтгæй райсгæйæ, бæстæйы командæ сси чемпион. Бацахста 3 фыццаг бынаты. Ахæм бæрæггæнæнтæ нæ уыд 1967-æм азæй фæстæмæ. Республикæйæн дæр ерыстæ систы æнтыстджын. Спорты ацы хуызы нæм дунеон чемпион фыццаг хатт фæзынд.
Мамиаты Владимир, РЦИ-Аланийы авиамодельты спорты федерацийы президент: «Ацы куыд хорз цыд акодтой, афтæ нæм никуы ма уыд. Ахæм гыццыл республикæйæ 2 лæппуйæ иугонд командæйы. Уый махæн тынг æхсызгон уыд. Фарон нæм уыд стыр ерыстæ. Тынг хорз ацыдысты. Алы аз дæр фæархайæм Кæсæг-Балхъары ерысты. Уæдæ æндæр искуыдæм дæр ацæуæм».
Ныртæккæ фæсивæд сæхи цæттæ кæнынц Европæйы чемпионатмæ. Авиамодельты спорты федерацийы сæ зæрдæ дарынц, ацы хатт Уæрæсейы иугонд командæмæ Цæгат Ирыстонæй 3 спортсмены кæй бахаудзæн, ууыл.
Хъайтмазты Дзерассæ
