Арфæйы фыстæджытæ райсдзысты 800 мин адæймагæй фылдæр
3-æмæй – 9-æм майы онг нæ бæстæйы цæуы Стыр Уæлахизимæ баст акци. Арфæйы фыстæджытæ райсдзысты 800 мин адæймагæй фылдæр. Уыдонæй 4 мин ветераны сты Цæгат Ирыстонæй. Сæйрагдæр у, цæмæй иунæг хæствæллад хистæр дæр æнæ рæвдыдæй ма баззайа, уый.
Фыдыбæстæйы Стыр хæсты ветеран Лариса Раенко пенсийы рацæуыны размæ йæхæдæг дæр бирæ азты фæкуыста почтæйы. Ацы хатт та йæм почтæйы кусджыты æрбацыдысты сæхæдæг, æмæ йын Уæрæсейы Президенты номæй æрбахастой арфæйы фыстæг. Хæствæллад хистæрæн йæ бон йæ цæссыгтæ бауромын нæ баци.
Æртыккæгæмæй – фарæстæм майы онг аст сæдæ мин адæймагæй фылдæр нæ бæстæйы алы регионтæй райсдзысты ахæм æхсызгон фыстæджытæ. Цæгат Ирыстоны та аивгонд къонвертты хицæуттæ систы, тохы быдыры æмæ фронты фæсчъылдым чи тох кодта, ахæм 4 мин ветеранæй фылдæр.
Æцæгæйдæр, почтæйы кусджытæн ныртæккæ арæхдæр дуар байгом кæнынц ветеранты хæстæджытæ. Сæйрагдæр у, цæмæй иунæг хæствæллад хистæр дæр æнæ рæвдыдæй ма баззайа, уый.
Уымæй дарддæр ма Уæрæсейы Президенты уынаффæмæ гæсгæ, фронтовиктæ федералон бюджетæй райсдзысты фæйнæ 10 мин сомы. Нæ республикæйы ахæм æххуысы аккаг систы сæдæ иуæндæс адæймаджы. Се хсæн сты Фыдыбæстæйы Стыр хæсты ветерантæ æмæ инвалидтæ.
