Балæвæрдта курдиат, Уæрæсейы рекордты чиныгмæ бахауыны тыххæй
3 метры æмæ 42 сантиметры. Ахæм бæрзæнд ис, Хъæстуаты Игорь йæ хæдзары кæрты цы хурмæзилæг æрзайын кодта, уымæн. Балæвæрдта курдиат, Уæрæсейы рекордты чиныгмæ бахауыны тыххæй. Ныр хъæуы банхъæлмæ кæсын, специалисттæ æнтыстдзинад куы сфидар кæной, уымæ. Уæвгæ, аграрон кусæджы зæххы хай æрмæст ацы зайæгойæ зындгонд нæу. Бæлвырддæр хабæрттæ радзурдзæн Хъайтмазты Дзерассæ.
Фыццаг уыд чысыл æхсынæн. Ныр та дзы рауад æцæг бæлас – йæ бæрзæнд 3 метры æмæ 42 сантиметры. Хурмæ йæхи æлвасы. Астрон мыггаджы зайæгой Хъæстуаты Игорь æрзайын кодта æнæ химикаттæй. Донимæ йæ æфсæста йæ аудындзинадæй.
Æмæ та ног æнтыстдзинад. Ацы хæдзары кæрты ис Уæрæсейы рекордсмен. Хурмæзилæджы фарсмæ нартхор. Уымæн дæр йæ бæрц чысыл нæу. 2019-æм азы та ам æрзад, йæ хъæды бæрзæнд 450 сантиметры кæмæн уыд, ахæм нартхор. Сси Уæрæсейы рекордсмен. Уæвгæ, ацы зæххы хайыл бирæ æндæр халсартæ æмæ дыргътæ ис.
Зайæгойтæ кæрæдзийы нæ хъыгдарынц. Сæйрагдæр у – афоныл сæ донæй æфсадын. Ацы хъуыддаг сæххæст кæнын аграрий нæ рох кæны æхсæвыгон дæр.
Ацы хъуыддагмæ уарзондзинад æмæ, æнæмæнг, зонындзинæдтæ. Æрмæст уый руаджы Хъæстуаты Игоры къухы *фты ахæм æнтыстдзинæдтæ. Республикæйы хъæууон хæдзарады сгуыхт кусæг арæх æрымысы йе студентон цард, æмæ йын зонындзинæдтæ чи радта, уыцы ахуыргæнджыты.
Зæгъæн ис, цы ма хъуамæ æрзайын кæна, æмæ сæйрагдæр та – кæм. Фæлæ Игорьмæ нырма бирæ нысантæ ис. Фæнд кæны йæ бинонты, раздæрау, æрмæст пайдайаг продукттæй æххæст кæнын æмæ рекордтæ æвæрын.
