30 кабинетæй алкæцыдæр ныртæккæ дзуапп дæтты æппæт нырыккон ахуырадон домæнтæн. Цы кусæгнгæрзтæ æмæ дзы техникæ æвæрд æрцыд, уыдонмæ бирæтæ хæлæг кæнынц.
«Ахæм уавæрты кусын у удæнцой» зæгъынц ахуыргæнджытæ. «Алцæмæй ифтонг куы уай, хорз кусæнгæрзтæ дæм куы уа, уæд уроктæ дæр кæнынц цымыдисаг, сывæллæттæ дæр разæнгарддæрæй ахуыр кæнынц, фæнды сæ фылдæр базонын».
Хицæн ныхасы аккаг у химийы æмæ физикæйы лаборатори. Æвзонг ахуыргæндты бон дзы у иртасæн куыст кæнын. Ахуыргæнджыты бон та дзы у федералон æмæ республикон программæтæ æххæст кæнын.
Скъолайы кæд реконструкци скодтой, уæддæр ма дзы цæуынц рацарæзты мадзæлттæ. Уый фæрцы ма сæ уавæртæ ноджыдæр хуыздæр фæуыдзысты.
460 скъоладзауæн сæ 90 % æмхиц сты спортмæ. Æмæ скъолайы ног спортивон зал кæй байгом кодтой, уый сын у уæлдай æхсызгон. Самбойæ, уæгъдибар хъæбысхæстæй, стъолыл хъазгæ теннисæй уæлдай ма сын ныр фадат уыдзæн туризмæй архайын. Рæхджы байгом уыдзысты ног баскетболон æмæ футболон фæзтæ.
Скъола куыд конд у, уымæй разы сты ныййарджытæ дæр. Сывæллон боныгон фылдæр рæстæг скъолайы вæййы æмæ дзы цæуыл сахуыр уа, уыдон хæсдзæн дарддæр. Хъæдæрмæгимæ æмæ згъæртимæ кусæн æрмадзтæ дзы кæй байгом кодтой, уый дæр ныййарджытæм хорз фæкаст. Афтæмæй лæппутæ ахуыр кæнынц кусæг дæсныйæдтыл. Хуыздæр фæарæхсынц хæдзары куыстытæм.
Скъолайы рацарæзт дарддæр æххæстгæнгæйæ дзы рæхджы фæзындзысты хæрæндон æмæ хъазæн фæз. Зæгъын хъæуы уый æмæ ахæм куыст бакæнын къухы бафтыд федералон инвестицион программæ Уæрæсейы Хуссар хай» æххæстгæнгæйæ.
Йе ххуысæй Цæгат Ирыстоны арæзт æрцыд æрмæстдæр 5 ахæм скъолайы.
