Ацы хатт семæ уыдысты Æппæтуæрæсеон адæмон фронты активисттæ
Фæстаг рæстæг маскæтæ дарын сси æнæмæнг хъæугæ домæн. 4 ведомствойы кусджытæ рацыдысты радон рейды æмæ бæрæг кодтой æхсæнадон транспорты куыст. Ацы хатт семæ уыдысты Æппæтуæрæсеон адæмон фронты активисттæ. Рейды уыд нæ уацхæссæг Гæджиты Сослан дæр, æмæ радзурдзæн бæстондæр хабæрттæ.
Афтæ æппынæдзухдæр. Ацы хатт фæлхасадмæ æмæ транспортмæ цæстдарды управлениты, мидхъуыддæгты æмæ транспорты министрадты кусджытимæ иумæ рейды рацыдысты Æппæтуæрæсеон акци «Мах стæм иумæ»-йы волонтертæ. Се ппæтæн дæр уæрстой зæрдылдарæн хъусынгæнинæгтæ. Уым бæлвырд фыст уыдис, пандемияйы рæстæг хи куыд бахъахъхъæнæн ис, уый. Иумæйаг хъарутæй адæммæ æнцондæр бахæццæ кæнæн ис, æдасдзинады мадзæлттæ куыд æххæст кæнын хъæуы, уый.
Маскæтæ дарын ныртæккæйы уавæрты у ахсджиаг хъуыддаг. Афтæ хъуыды кæны Артем Нагорный дæр. Нæ йæ æмбары, иуæй-иутæ специалистты амындтытæ куыд не ххæст кæнынц, уый.
Сентябры бæрнон куыстуæттæ цы иртæстытæ скодтой, уыдонмæ гæсгæ маскæтæ æхсæнадон бынæтты дарын æнæмæнг хъуыддагыл нымайынц Уæрæсейы цæрджыты 15%. Иннæты та фидарæй уырны, маскæ сæ кæй нæ бахъахъхъæндзæн, уый. Фæлхасадмæ цæстдарды управленийы специалист Хынцæгты Виталийы хъуыдымæ гæсгæ та маскæ æцæгæй дæр у коронавирусы ныхмæ фæрæз.
Пандемия кæд фæуыдзæн, уый бæрæг нæма у. Алы бон дæр нæ республикæйы ковидæй фæрынчын вæййы 80 адæймаджы онг. Хатгай вæййынц фылдæр. Уымæ гæсгæ хи хъахъхъæныны хъуыддаг аразгæ у адæмæн сæхицæй.
