Хæлар ахастдзинæдтæ Украинæйы æмæ Цæгат Ирыстоны скъоладзауты хсæн. Дзæуджыхъæуы 44-æм скъолайы кафджыты къорд «Скифтæ» æмæ Киевы хореографион ансамбль «Юность» базонгæ сты фестиваль «Хæлардзинады кафт»-ы.
Украинæйы æмæ Цæгат Ирыстоны скъоладзаутæ кæрæдзийы æнæ дзургæйæ æмбарынц. Кафты рæсугъд æвгзаг сын радта хæлардзинадмæ фæндаг. Цæхæрцæст фæсивæды ирд кæфтытæ фестиваль «Хæлардзинады кафты» тынг фæцыдысты адæмы зæрдæмæ, æмæ уыцы мадзалы руаджы Киевы хореаграфион ансамбль «Юность» æмæ Дзæуджыхъæуы 44-æм скъолайы кафджыты къорд «Скифтæ» тынг балымæн сты. Уæвгæ, 44-æм скъолайы кафджыты къорд рагæй ис. Сывæллæтты дзы тынг зæрдиагæй архайынц. Уæдæ сæ кæфтытæ равдисынмæ дæр алы рæттæм ацæуынц. Украинæмæ балц дæр у уыдонæй иу.
Джиоты Ланæ, Дзæуджыхъæуы 44-æм скъолайы кафджыты къорд «Скифты» архайæг: «Куыддæр æрцыдыстæм, афтæ уыцы бон дæр нын хъуамæ концерт уыдаид, æмæ тынг фæлладæй æрцыдыстæм, мын уый тыххæй дæр зын уыдис, цæмæй нæхи æртымбыл кæнæм, нæхи сахорæм».
Гугкаты Илонæ, Дзæуджыхъæуы 44-æм скъолайы кафджыты къорд «Скифты» архайæг: «Тынг хъуыды кодтам, куыд акафдзыстæм, куыд нын рауайдзæн, фæлæ дзæбæх акафыдыстæм, дзæбæх нын рауадис. Бузныг нæ хореографæн, тынг нын баххуыс кодта».
Æмбалты Аминæ, Дзæуджыхъæуы 44-æм скъолайы кафджыты къорд «Скифты» архайæг: «Мах дæр нæхæдæг концерт радтам, нæхи рон кæфтытæ, стæй уыдонæ дæр, мах æй нæ зыдтам афтæмæй симд, хонгæ уыдон акафыдысты».
Сæ украинаг æмгæрттæн скъоладзаутæ бацæттæ кодтой сæрмагонд программæ. Симд, Хонгæ, чызджыты æмæ ма суанг испайнаг кафт дæр. Нæ хæлæрттæн нæ аивад æвдисын æнцон нæ уыд, зæгъы кафджыты къорд «Скифты» кафæг Киситы Хетæг.
Киситы Хетæг, Дзæуджыхъæуы 44-æм скъолайы кафджыты къорд «Скифты» архайæг: «Киевæй скъоладзаутæ махмæ ссыдысты уалдзæджы. Уыдысты нæ уазджытæ, ссыдысты нæм фестиваль «Танец Дружбы»-мæ. Æмæ уым базонгæ стæм. Акафыдыстæм дзы Хонгæ, нæ чызджытæ дзы акафыдысты чызджыты кафт. Уæдæ дзы заргæ дæр акодтам. Нæ зæрдæмæ тынг фæцыдис. Тынг рæсугъд горæт у, уыдыстæм дзы бирæ рæтты».
Украинæмæ балц рæсугъд æнкъарæнтæ балæвар кодта канд скъоладзаутæн нæ, фæлæ ма сæ ахуыргæнджытæн дæр. Зæрдиаг фембæлд, Киевы рæсугъддæр бынæттæм экскурситæ, Цæгат Ирыстоны делегацийы уæнгтæ ма федтой Украинæйы æфсæддон намысы бынæттæ дæр. Сæйрагдæр та уый уыд, æмæ дыууæ къордæн уыд иумæйаг концерт – «Хæлардзинады изæр», зæгъгæ.
Гиоты Эльвирæ, Дзæуджыхъæуы 44-æм скъолайы директоры хæдивæг: «Киевы скъоладзаутимæ базонгæ стæм ам, фестиваль «Танец дружбы»-йы. Æмæ нæ фæззæджы сæхимæ ахуыдтой. Уыдыстæм дзы бирæ хорз бынæтты. Мæнмæ гæсгæ фестиваль «Танец дружбы» йæ хæс сæххæст кодта, сывæллæттæ алы бæстæтæй кæрæдзийы базыдтой æмæ балымæн сты».
Фæстиваль «Хæлардзинады кафт»-ы руаджы сфæлдыстадон къордтæ Уæрæсейы регионтæй, стæй хæстæг фæсарæнтæй базонгæ сты кæрæдзиимæ æмæ ныр дæр сты тынг лымæн. Уый та уыд фестиваль аразджыты сæйраг хъуыды.
Дзæуджыхъæуы æмæ Киевы скъолаты хсæн цы хæлардзинады ахастдзинæдтæ ныффидар сты, уыдон фæсивæд дарддæр дæр хæццæ кæнынц. Ныр та уазæгуаты се мгæрттæм ссæудзысты скъоладзаутæ Украинæйæ.
