Афтæмæй кусын райдыдта Майрæмададжы скъолайы
Æнтыстджын горæтаг педагогы хъæумæ кусынмæ ацæуынмæ цы разæнгард кæны? 5 азы размæ Тыбылты Зæлинæ сфæнд кодта программæ «Земский учитель»-ы бацархайын. Афтæмæй кусын райдыдта Майрæмададжы скъолайы. Ныр йæ ахуырдзаутæн у хорз зондамонæг æмæ ирд дæнцæг. Чехойты Фатимæ радзурдзæн бæстондæр.
Математикæйы алы радон урок дæр – зонады ног къæпхæн. Уарзон ахуыргæнæгмæ хъусгæйæ, – цыма алгебрæ æппындæр зын предмет нæу. Нымæцты æмæ арифметикæйы дунейы Тыбылты Зæлинæ архайы 17 азы. Уыдонæй 5, хъæуккаг ахуыргæнæнæгæй кусы Майрæмададжы скъолайы. Ацы ахуыргæнæндон йæхæдæг равзæрста.
Программæйы архайд Тыбылты Зæлинæйæн уыд йæ дæсныйады фæлварæн. Математикæйы ахуыргæнæгæй куыста Дзæуджыхъæуы 21-æм скъолайы. Йæ ныфс бахаста горæтаг ахуыргæнæдон хъæуккагыл баивынмæ. Фыццаг мæйты бæрæг уыд, сывæллæтты зонындзинæдтæ арф кæй не сты, уый. Ныртæккæ математикæ сси скъоладзауты уарзон предмет.
8-æм къласонтæ хорз ахуыр кæнынц. Сæ зонындзинæдтæй рухс кæнынц сæ математикæйы ахуыргæнæджы, уыцы-иу рæстæг сæ къласы разамонæг чи у, уый зæрдæ. 14 скъоладзауы кабинеты – горæтаг скъолайы фæстæ уыцы хицæндзинад фыццаг мæйты æнахуыр уыд. Зондамонæджы ныхæстæм гæсгæ, афтæ кусын æнцондæр у – рæстæг фаг вæййы ног æрмæг алы сывæллонæн дæр бамбарын кæнынæн.
Майрæмададжы скъолайы ис 102 ахуырдзауы. Коллективы 30 адæймагæй 19 сты ахуыргæнджытæ. Се *хсæн – æрыгон специалисттæ дæр. Математикæйы ахуыргæнæгмæ æнхъæлмæ кастысты 2 азы. 2021-æм азы августы скъоламæ цы хъæуккаг ахуыргæнæг *рбакъахдзæф кодта, уый сси æнгом коллективы хай.
Программæйы домæнтæм гæсгæ хъæуккаг скъолайы Тыбылты Зæлинæ хъуамæ фæкуса 5 азы. Августы йæ контракты рæстæг фæуыдзæн. Уый фæстæ дæр ма кусдзæн Майрæмададжы скъолайы, æви нæ, уый нæма сбæлвырд кодта. Ныр ма уал йæхæдæг, скъоладзау уæвгæйæ, куыд уарзта математикæ, афтæ зæрдиагæй йæ амоны йæ ахуырдзаутæн.
Федералон программæ «Хъæуккаг ахуыргæнæг» царды уагъд цæуы национ проект «Фæсивæд æмæ сывæллæттæ» æххæстгæнгæйæ. Проект куы фæзынд ,уæдæй нырмæ республикæйы куысты бынæттæ ссардтой 60 специалисты. 2026-æм азы та «Хъæуккаг ахуыргæнджытæ» суыдзысты 19 педагогы. Уый та амоны – Цæгат Ирыстоны хъæуккаг скъолаты ахуырадон процесс уыдзæн æнтыстджындæр.
