Уый тыххæй журналисттæн радзырдта Цæгат Ирыстоны паддзахадон академион театры аивадон разамонæг Уалыты Гиви
57 мин аивадуарзæджы бабæрæг кодтой ацы сезоны Тæбæхсæуты Балойы номыл Ирон академион театр. Уыимæ билеттæ фылдæр æлхæдтой фæсивæд. Уый тыххæй журналисттæн радзырдта Цæгат Ирыстоны паддзахадон академион театры аивадон разамонæг Уалыты Гиви. Куыд загъта, афтæмæй 2024-æм аз хъæздыг уыд ирд премьерæтæй æмæ гастрольтæй. Ахæм уыдзæн фидæны сезон дæр. Зæгъæм, 20-æм сентябры Ирон театр гастрольтæм абалц кæндзæн Белоруссимæ. Уым равдисдзысты æртæ спектаклы: «Гæздæнтæ», «В списках не значился», стæй «Он, она, окно, покойник». Уæвгæ, пресс-конференцийы уæлдай æргом азæдхтой ног театралон сезонмæ. Уымæн æмæ уыдзæн юбилейон. Театры 90 азы бонмæ сæвæрдзысты премьерон постановкæ – Черчесты Георгийы романмæ гæсгæ «Фæдзæхст». Спектакль уыдзæн дыууæ хайæ арæзт – «Гуырæнтæ» æмæ «Фæлварæнтæ», æмæ цæудзæн дыууæ боны.
