Баст уыдзысты нæ республикæйæн бындур сæвæрыны 100 азы бонимæ
6-7-æм июлы Цæгат Ирыстоны ацæудзысты бæрæгбоны мадзæлттæ. Баст уыдзысты нæ республикæйæн бындур сæвæрыны 100 азы бонимæ. Куыд сæм цæттæ кæнынц, уый тыххæй дзырдтой, Дзанайты Барисы разамындæй æмбырды. Сæйраг фæз уыдзæн Дзæуджыхъæуы центрон хайы. 6-æм июлы 11 сахатæй 16 сахаты онг мадзæлттæ цæудзысты Хетæгкаты Къостайы номыл Центрон парчы, стæй Сабырдзинады пропекты. Уым республикæйы цæрджытæн æмæ уазджытæн фадат уыдзæн чингуыты æмæ хъæууонхæдзарадон армукъатæ бабæрæг кæнынæн. Уымæй дарддæр дзы уыдзысты гастрономон фæзтæ, «нарты хъæзтытæ», дæсныйадæвдисæг ахуыртæ робототехникæйæ, туристон техникæйæ, зырнæй зилынæй æмæ куырдадзы хъуыддагæй. Сабырдзинады проспекты ма уыцы рæстæг арæзт æрцæудзæн акци «Музыка на балконах», æрмдæсныйады вернисаж æмæ æрмдæсныты армукъа «Ирыстоны мозаикæ». 14:00 сахатыл Ирон театры уыдзæн кадджын мадзал. Архайдзысты дзы Уæрæсейы Президенты æххæстбарджын минæвар Цæгат Кавказы федералон зылды Юрий Чайка, республикæйы сæргълæууæг Сергей Меняйло æмæ Цæгат Кавказы иннæ субъектты сæргълæуджытæ. Паддзахадон музейты байгом уыдзысты равдыстытæ. Бæрæгбоны мадзæлттæ фæуыдзысты сабаты 19:00 сахатыл Сæрибары фæзы стыр концертæй.
