Беслæны цалдæр бирæуæладзыгон хæдзары сæртæй фатертæм нырма хъары дон
6-æм июны республикæйы уыд их æмæ тыхджын къæвда. Æрдзон фыдбылыз æппæтæй стырдæр зиан æрхаста Рахизфарсы районæн. Йæ фæстиуджытæ абон дæр кæронмæ аиуарс кæнын нæма бантыст. Беслæны цалдæр бирæуæладзыгон хæдзары сæртæй фатертæм нырма хъары дон. Бæлвырддæр хабæрттæ радзурдзæн Хъайтмазты Дзерассæ.
6-æм июны цы их æмæ тыхджын дымгæ уыдысты, уыдон Кадиты Иринæйы ныууагътой æнæ хæдзары сæрæй. Беслæны Уæлахизы уынджы 65 «Б»-йы бирæуæладзыгон хæдзары сæрæн кæд йæ иу хай фехæлд, уæддæр йæ фæстиуджытæ адæмæн сты уæззау. Тæрккъæвдаты фæстæ ма цалдæр фатермæ хъары дон. Уыимæ Иринæ куыд зæгъы, афтæмæй йæ цæрæнуат æрæджы бындуронæй цалцæг скодта.
Хъыгдард баййæфта сыхаг 7-уæладзыгон хæдзары сæр дæр. Цæрджытæ радзырдтой, администраци сын уайтагъд кæй баххуыс кодта – æрбаластой ног шифер. Фæлæ бæстыхайы сæр адæм уæддæр сæхи фæрæзтæй сцалцæг кодтой, уымæн æмæ арæзтадон æрмæг не сбæззыд. Лифты шахтæ кæуылты цæуы, уыцы хай æмбæрзт у профнастилæй.
Æнæ сæрæй ма ныры онг у горæты ДОСААФ-ы бæстыхай дæр. Ног æмбæрзæн дымгæ уайтагъд систа. Организацийы директоры ныхæстæм гæсгæ, фарста хи тыхтæй лыг кæнын хъæудзæн. ДОСААФ нæ хауы муниципалитеты балансмæ, цалцæггæнæн куыстытæн сын компенсаци не *мбæлы.
Районы администрацийы радзырдтой, цалцæггæнæн куыстытæ æххæстгонд цæуынц æрвылбон. Æрдзон фыдбылызæй цы бирæуæладзыгон хæдзæрттæ хъыгдард баййæфтой, уыдонмæ базилдзысты 10 боны æмгъуыдмæ. Фæстиуджытæн сæ фылдæр хай ныридæгæн аиуварс кодтой.
Æрдзон фыдбылызы аххосæй Беслæны хъыгдард баййæфтой 30 бирæфатерон хæдзары æмæ 400 хи хæдзары. Бынæттон администрацийы куыд загътой, афтæмæй бирæ куыст кæй ис, уый тыххæй фæлладуадзæн зонæтæ бафснайынæн нæ фаг кæны кусджытæ æмæ техникæ. Уымæ гæсгæ сæ кæд саив кæндзысты, уый нырма бæрæг нæу.
