Сног кодтой коммуникацитæ, базылдысты бæстыхайы æддаг бакастмæ, стæй ма сарæзтой актон зал
60 азмæ фыццаг хатт Джызæлы скъола-интернат æрцыди бындуронæй цалцæггонд. Сног кодтой коммуникацитæ, базылдысты бæстыхайы æддаг бакастмæ, стæй ма сарæзтой актон зал. Нырæй фæстæмæ скъоладзаутæн уыдзæн нырыккон уавæртæ ахуыр кæнынæн æмæ сæхи дзæбæх кæнынæн. Куыстытæ цыдысты, национ проект «Фæсивæд æмæ сывæллæттæ» æххæст кæнгæйæ. Бæлвырддæр хабæрттæ радзурдзæн Чехойты Фатимæ.
Ацы сывæллæттæн сæ ахуыры аз райдыдта ноггонд скъолайы. Афæдз æмæ *рдæджы онг цалцæггæнæн куыстытæ æмæ кълæстæ базонæн нал ис. Раздæры рæстæгæй ма дзы баззадысты æрмæст мысинæгтæ.
Специалисттæ сног кодтой ахуыргæнæндоны æддаг къул, рацарæзтой йын йæ алыварс территори. Ацы куыстытæ проектмæ хаст нæ уыдысты. Скæнын сæ бантыст профилон министры уынаффæмæ гæсгæ. Кæд скъола бындурон цалцæггонд æрцыд национ проект «Фæсивæд æмæ сывæллæттæ» æххæстгæнгæйæ, уæд уæлæмхасæн куыстытæн та фæрæзтæ радих кодтой республикæйы бюджетæй.
Райдиан скъола дæр сцалцæг кодтой республикæйы бюджеты фæрæзтæй. Кадджын мадзæлттæн ног агъуыст рагæй уыд ахуыргæнджыты æмæ сывæллæтты бæллиц. Æмæ сын ныр сæххæст. Уыцы агъуыст скъолайæн у подрядон куыстуаты лæвар. Чысыл спортивон залæй сараздзысты актон. Уыцы куыст хъуамæ фæуой сентябры кæронмæ.
Цалцæджы алы къæпхæнмæ цæст дардтой ахуыргæнæндоны кусджытæ. Активонæй архайдтой алы хъуыддаджы дæр. Зæгъæм, къæридоры æмæ кълæстæн ахорæнты хуыз сæхæдæг равзæрстой. Фæстæдæр зæрдиагæй цæттæ кодтой сæ кълæстæ ахуыры азы райдианмæ. Ног техникон фæрæзтæй дæр скъола ифтонг у. Иу ныхасæй, ам ахуыр кæнынæн арæзт æрцыдысты хорз уавæртæ.
Ацы ахуыры аз Цæгат Кавказы иунæг санаторон хуыз ахуыргæнæндонмæ æрмæст ног зондамонджытæ не *рбацыдысты, фæфылдæр скъоладзауты нымæц дæр. Сты 300-æй фылдæр. Уыдонæн сæ 40 % ахуыргæнæдоны исынц зонындзинæдтæ æмæ медицинон лæггæдтæ. Æхсæвхуыссæн бæстыхай æмæ хæринаггæнæн дæр æрцыдысты цалцæггонд.
Скъолайы ног ахуыры азмæ скодтой егъау куыст. Ахуыргæнæдон 60 азы дæргъы бындурон цалцæггонд нæ уыд. Йæ территори у стыр – ахсы зæххы 5 гектары. Уый дæр фæнд кæнынц рацаразын. Йæ саив кæныны хъуыдытæ – бирæ, хъæуынц фæрæзтæ. Уый – фидæнмæ нысантæй иу. Ныр та сæйрагдæр у ахуырадон процесс.
Ацы аз скъола бахауд республикæйы хуыздæр хъæуккаг ахуыргæнæндæтты хыгъдмæ. Уыцы уæлвæзад бирæ азтæм ныффидар кæнын у зондамонджыты æмæ сывæллæтты хæс.
