Ныр 2 азы нал амоны хабæрттæ, фæлæ куыд зæгъы, афтæмæй абоны онг йæхи æнкъары телеуынынады адæймагæй
Телевизион авивады дæсны. 60 азы сæххæст, Дудиаты Владимир фыццаг хатт телеуынынады экранæй Ирыстоны цæрджытæн «Уæ бон хорз» куы загъта, уæдæй.
Зæрдæхæлар, хиуылхæцгæ, алкæйы зæрдæмæ дæр фæндаг чи ссары, ахæм адæймагæй республикæ зоны Дудиаты Владимиры. 58 азы алы изæр дæр цыди алы хæдзармæ дæр, æмæ сын хъусын кодта регионы ахсджиагдæр хабæрттæ. Амыдта куыд информацион, афтæ тематикон программæтæ дæр. Экраны фæтк ын у æппæты сæйрагдæр. Владимир студийы æрвыста 8 сахатæй 15 сахаты онг. Бирæтæ иу æнхъæлмæ кастысты йæ программæмæ, уæд нæ бон хуыздæр арвитдзыстæм, зæгъгæ. Цæстуарзонæй йе мкусджытæн лæвар кодта ацы дæсныйады сусæгдзинæдтимæ, уæвгæ йæм абон дæр бафæрсынмæ арæх бадзурынц. Кæдфæндадæр уыди æмæ абон дæр у, æппæты уæлдæр къæпхæны профессионал.
Эфиры рæстæг йæ фæлмæн ныхасыхъæдæй дзыллæтæм хаста æгæрон æхсызгондзинад. Бирæ азтæм телеуынынад Владимирæн сси дыккаг хæдзар, йе мкусджытæ та абон дæр бирæ кæй уарзы, уыцы стыр бинонтæ. Ирыстоны фыццаг диктортæй иу Дудиаты Владимирæн бантыст йæхи æнæбафæзмгæ стиль сфидар кæнын. Хабæрттæ кæсгæйæ йын ахсджиаг уыди æрмæст радзурын нæ, фæлæ телевизормæ кæсджытимæ диалог скæнын. Иу хуызæн арф æнкъардта æмæ æнкъары куыд ирон дзырд, афтæ уырыссаг дæр.
Ныр 2 азы нал амоны хабæрттæ, фæлæ куыд зæгъы, афтæмæй абоны онг йæхи æнкъары телеуынынады адæймагæй. Уарзонæй æрымысы йæ эфиртæ. Ныр дæр кæсы йæ уарзон программæтæм. Зоны телеуынынады алы кусæджы дæр. Владимир йæ алы æмкусæгæн дæр у фыццаджыдæр йæ хæлар, стæй йæ цæстуарзон хистæр. Абон дæр раздæры хуызæн йæ хæлар зæрдæйы ахаст уары алы телеуынынадмæ кæсæгыл дæр.
