Фæсивæды ргом национ культурæмæ здахын, мадæлон æвзаг сын уарзын кæнын. Æмæ уыдон æппæт нысантæ не сты. Æххæст та сæ кæны национ фестиваль «Фыдæлты фарн». Ацы аз арæзт æрцыд 7-æм хатт. Йæ байгом кæныны кадджын мадзалы уыд не сфæлдыстадон къорд, æмæ бæлвырддæр хабæрттæ радзурдзæн Чехойты Фатимæ.
Афтæ, традицимæ гæсгæ, кувгæйæ, æртæ чъирийы æмæ ирон бæгæныимæ байгом 7-æм национ фестиваль «Фыдæлты фарн». Мадзал Цæгат Ирыстоны базарадон-экономикон колледжы сси нæ республикæйы æппæт национ-культурон æхсæнадты иугæнæг фæз. Уыцы æмархайд ахсджиагыл нымайы ахуыргæнæндоны директор Æбиты Валерий.
Фыццаг уæладзыджы уазджытæн арæзт æрцыд гастрономон равдыст. Бацæттæ сын кодтой бирæ хæрзад хæринæгтæ. Фестиваль кадджын уавæры байгом. Ардæм æрбацыд республикæйы Парламенты сæрдар Тускъаты Таймураз. Уый æркаст, гастрономон равдыстмæ æмæ республикæйы национ æхсæнæдтæ цы экспозици бацæттæ кодтой, уымæ. Фæнысан кодта, ахæм мадзæлттæ ахъаз кæй сты адæмты *хсæн бастдзинæдтæ фидар кæнынæн æмæ традицитæ æххæст кæнынæн.
Колледжы сфæлдыстадон къордтæ æмæ республикæйы артисттæ уазджытæн бацæттæ кодтой концерт. Адæмы уарзон уацмыстæ акодта зарæггæнджыты къорд Дзанайты Ольгæйы разамындæй, ахуыргæнæндоны студенттæ та акафыдысты «Симд». Республикæйы алы районтæй скъоладзаутæ ерыс кодтой бæгæны фыцынæй. Доййаты Надеждæ фыццаг аз архайы мадзалы. 12 азы йеддæмæ йыл нæма цæуы, фæлæ уæддæр зоны бæгæны фыцыны сусæгдзинæдтæ.
Нырыккон царды адæмон æгъдæуттæ æххæст кæнын, æрыгæтты национ культурæмæ, ирон бæрæгбæттæм цымыдис кæнын, мадæлон æвзагмæ уарзондзинад æвзæрын кæнын, фæсивæды монон культурæйы рæзтыл кусын – уыдысты фестивалы сæйраг хæстæ.
Фестиваль «Фыдæлты фарн » ахæсдзæн 2-æм декабрьмæ. Къуырисæры уыдзæн йе *хгæнæн бон. Уæлахиздзаутæ хорзæхгонд æрцæудзысты лæвæрттæй æмæ кады гæххæттытæй.
