Ансамбль «Хæхты зæлтæ»-йы солист Хан Демиров 7 секунды æнæрлæугæйæ, йæ къухтыл æмæ йæ къæхтыл зылдта 4 барабаны. Ирыстойнаг лæппуйы тыххæй æрмæг Гиннесы чиныджы фæзындзæн сентябры.
Доулистты ансамбль «Хæхты зæлты» концерт Мæскуыйы чи федта, уыдонæй тагъд нæ ферох уыдзæн. Иуæй аивадуарзджыты зæрдæтæ барухс кодтой, иннæмæй та иууылдæр уыдысты Гиннесы рекордæн æвдисæн.
Ансамблы солист Хан Демиров уыцы иу рæстæг, 7 секъунды æнæрлæугæйæ, йæ къухтыл æмæ йæ къæхтыл зылдта 4 доулы. Конкурсмæ, бæлвырддæр зæгъгæйæ та, ацы номермæ цæттæгæнгæйæ, аскъудта 3 доулы. Хан куыд зæгъы, афтæмæй цæмæй ацы `нтыстдзинад йæ къухы бафта, ууыл гыццыл нæ бафыдæбон кодта æмæ йын æхсызгон у, йæ бæллиц кæй сæххæст, уый.
Æрыгон артисты рекорд федтой Гиннесы рекордты чиниджы минæвæрттæ дæр. Рекордтæ регистрацигæнæн комитеты сæрдар Ханæн радта сæрмагонд сертификат æмæ ныр дунейыл айхъуысдзæн ирыстойнаг лæппуйы кой.
Хан Демиров та кæд йе нтыстдзинадыл цин кæны, уæддæр гыццыл дис дæр кæны… Уæвгæ, 2 азы размæ дæр ма доулæй хуымæтæг цагъд акæнын дæр йæ бон нæ уыд. Уый размæ та 8 азы кафыд «Дети гор»-ы, фæлæ райста цæфтæ æмæ йын кафæн нал уыд. Æмæ уæд йæ зæрдæйы фæндонмæ гæсгæ райдыдта барабантыл цæгъдын.
Фæлæ цыбыр рæстæгмæ йæ къухы бирæ бафтыд. Фæлтæрдджын музыканттæ куыд зæгъынц, афтæмæй цæмæй ахæм цагъд кæнай æмæ доулæй афтæ арæхсай, уый тыххæй суанг гыццылæй хъæуы бирæ кусын.
Рекордсмен та тынг бузныг у йæ разамонджытæй æмæ йе мбæлттæй. 11-æм къласы ахуырдзау Хан Демиров йæхи хуымæтæг ахуырдзауыл нымайы. Фæлæ дзы ахуыргæнджытæ æмæ æмкъласонтæ сæрæстыр сты. Гиннессы чиныджы аккаг чи сси, уыцы лæппу раздæрау, у хæларзæрдæ æмæ куыстуарзон. Фæсурокты йæ арæх фенæн вæййы кафджытимæ. Фæцæгъды сын доулыл…
Ансамблимæ Хан гастрольты уыд Европæйы æмæ Уæрæсейы бирæ горæтты. Йæ курдиатæн бирæтæ уыдысты æвдисæн. Нырæй фæстæмæ та аивадуарзджытæн фадат уыдзæн 17-азыдзыд рекордсмены номертæм кæсын.
Гиннесы чиныджы та йæ ном фыст æрцæудзæн сентябры, чиныджы ног рауагъд куы рацæуа, уæд.
