1969-æм азы йæ разамындæй бынæттон «Спартак» фыццаг хатт йæ историйы бацыд æппæтцæдисон чемпионаты уæлдæр дивизионмæ
79 аздзыдæй йæ цардæй ахицæн Орджоникидзейы «Спартак»-ы легендарон футболист Нодар Папелишвили. 1969-æм азы йæ разамындæй бынæттон «Спартак» фыццаг хатт йæ историйы бацыд æппæтцæдисон чемпионаты уæлдæр дивизионмæ. Дæсгай азты дæргъы Нодар Папелишвили куыста сывæллæттимæ. Йæ активон архайдæй фæзынд спортивон скъола «Юность». Уæ зæрдыл уын æрлæууын кæндзыстæм, Нодар уыд ирыстойнаг командæйы историйы хуыздæр бомбардир. Йæ фыццаг къахдзæфтæ футболы кæнын райдыдта Цхинвалы. Орджоникидзейы «Спартачы» рæнхъытæ та баххæст кодта, командæйæн уæззæу рæстæг куы уыди, уæд. Фæлæ йæ хъазт æвæстиатæй дæр фæбæрæг командæйыл. Ам ныхас канд голты нымæцыл нæ цæуы, фæлæ йæ дæсны, æмæ бафæзмæн кæмæн нæй, уыцы техникæ. Классикон размæбырсæг уæвгæйæ, Нодар æмхуызон хорз хъазыди алы позициты дæр. Афтæмæй цæгатирыстойнаг футболы ныууагъта ирд фæд. Нодар Папелишвилийæн фæстаг фæндараст зæгъдзысты райсом, 6-æм сентябры Дзæуджыхъæуы, Дзанайы-фырты уынджы, 67-æм хæдзары.
