Ныхас цæуы скъолайы агъоммæйы ахуырады куыст чи кæны, ахæм организациты æмæ амалхъом адæмыл
9 милуан сомы радих кæндзысты афæдз æмæ `рдæгæй æртæ азы онг кæуыл цæуы, ахæм сывæллæттæн уæлæмхасæн бынæттæ кæныны тыххæй. Ныхас цæуы скъолайы агъоммæйы ахуырады куыст чи кæны, ахæм организациты æмæ амалхъом адæмыл. Уый тыххæй Хицауады æмбырды фехъусын кодта республикæйы ахуырад æмæ наукæйы министр. Людмила Башаринайы ныхæстæм гæсгæ, саразын хъæуы 70 бынатæй фылдæр. Федералон бюджетæй цы фæрæзтæ радих кæной, уыдон хардзгонд æрцæудзысты кусæнгæрзтæ балхæныныл. Хи организацитæ та сæхи рдыгæй, хъуамæ фиддонтæ фæкъаддæр кæной муниципалон æмвæзады онг. Ведомствæйы разамонæг ма æрдзырдта сывæллонмæ кæсыны тыххæй фиддонты рæстæмбисы бæрцы тыххæй дæр.
Æмбырды бахастой фæндон, «Земский доктор» æмæ «Земский фельдшер»-ы программæтæм ивддзинæдтæ бахæссыны тыххæй дæр. Бæлвырддæр та дзы чи архайы, уыдон цæмæй сæ кармæ гæсгæ мауал дих кæной. Раздæр Программæты архайдтой, æрмæстдæр 50 азы онг кæуыл цæуы, ахæм дохтыртæ. Æрныхас кодтой уыцы иу лæвæрд кæй кæнынц, уыцы фиддоны бæрцыл дæр. Афтæ, фельдшерæн у 750 мин сомы, дохтырæн та – милуан æмæ `рдæг. Æмбырды ныхас цыди социалон къабазыл дæр. Фæллойы æмæ социалон рæзты министры куыд фехъусын кодта, афтæмæй республикæйы куыст цæуы сидзæр сывæллæтты цæрæнуæттæй сифтонг кæныныл. Хуыбаты Барисы ныхæстæм гæсгæ рады чи лæууы, уыдон иууылдæр хæдзæрттæ райсдзысты 2025-æм азы онг. Хъæууон хæдзарады бирæ аразгæ у паддзахады æххуысæй. Тускъаты Таймураз бадомдта, цæмæй фосдарынады къабазы ацы аз йæ зæрды субсидитыл чи дары, уыцы куыстуæтты номхыгъд сфидар кæной рагацау.
