Уый кадæн мадзæлттæ цæуынц æмæ цæудзысты дарддæр
Абон 166 азы æххæст кæны Хетæгкаты Къостайы райгуырдыл. Уый кадæн мадзæлттæ цæуынц æмæ цæудзысты дарддæр. Бирæазон традицимæ гæсгæ, Ирон аргъуаны кæрты, Къостайы цыртдзæвæны раз ацæудзæн кадджын æмбырд. Сæвæрдзысты дидинджытæ, аив кæсдзысты поэты æнæмæлгæ рæнхъытæ. Мысæн мадзæлттæ ацæудзысты Театралон фæзы дæр. Ирон Академион театры ацæудзæн литературон-музыкалон композици «Весь мир мой храм». Изæры та равдисдзысты спектакль «Фатимæ». Уыимæ Цæгат Ирыстоны райдыдта фестиваль «Ирон фæндыр». Æрымысыдысты дзы Джыккайты Шамилы рухс ном. Адæмон поэты ингæныл Намысы Алеейы сæвæрдтой дидиндждытæ. Фембæлдысты йе фсымæр Муратимæ, стæй йæ чызг Зæринæимæ. Фестивалы архайджытæн сæ фылдæр зонгæ сты Шамилы сфæлдыстадимæ. Куыстой йæ уацмыстæ тæлмац кæныныл. Уыдон хаст æрцыдысты æмбырдгонд «И скорбь, и ярость, и любовь»-мæ. Чиныджы презентаци арæзт æрцыд Цæгат Ирыстоны паддзахадон университеты Юнескойы залы. Уым кады гæххæттытæ радтой, æмбырдгондыл чи куыста, уыцы атвортæн. Кæй зæгъын æй хъæуы, азæлыдысты Джыккайты Шамилы æмдзæвгæтæ дæр.
Фестиваль «Ирон фæндыр» Цæгат Ирыстоны арæзт æрцыд дыккаг хатт. Архайынц дзы 20 литераторы-тæлмацгæнæджы Мæскуыйæ, Челябинскæй, Екатеринбургæй, Ростовæй, Астраханæй, Липецкæй. Фестивалы сæйраг нысан у ирон литературæ парахат кæнын. Афтæ ивгъуыд аз ныммыхуыр кодтой Къостайы уацмысты 4 æмбырдгонды. Ратæлмац сæ кодтой авайраг, цæцæйнаг, нырыккон уырыссаг æмæ францусаг æвзæгтæм. Ацы аз та, фестивалы фæлгæты рауаддзысты 4 ног чиныджы.
