Официалон бæрæггæнæтæм гæсгæ Афганистаны хæсты архайдта 600 мин советон æфсæддонæй фылдæр
Абон 35 азы сæххæст, Афганистанæй Советон æфсæддæ куы ракодтой, уыцы историон цауыл. Официалон бæрæггæнæтæм гæсгæ Афганистаны хæсты архайдта 600 мин советон æфсæддонæй фылдæр. Фæстæмæ дзы нал сыздæхт 14 мин æрыгон лæппуйы. Инвалидтæ та дзы сси 6 мин адæймаджы. Ирыстонæй дзы архайдта мин 2 сæдæ æхсай аст адæймаджы, уыдонæй 84 нал сыздæхдысты сæ фыдыуæзæгмæ, 115 та сæ цардæй ахицæн сты службæйы фæстæ сæ уæды цæфтæй. Бæстондæр хабæрттæ Сосранты Жаннæйы сюжеты.
Бирæ мадæлты зæрдæйы рыст фæкъаддæр 1989 –æм азы 15 февралы Советон æфсæдтæ Афганистанæй куы ракодтой, уæд. Фæзынд сæм ныфс сæ фырттæ уырдæм æрвыст кæй никуыуал æрцæудзысты. Бирæ æрыгон лæппутæ сæ бинонтæн нæ хъæр кодтой, се фсæддон хæс кæм æххæст кæныц, уый. Сæ иу Тауаситы Артур. Астдæсаздзыдæй бахаудта уыцы уæззау уавæртæм, анахуыр бынæттæм.
Уыцы рæстæг зæрдæйæ дæр никуы фæхицæн уыдзæн. Æрмæст Афганистаны хæстæн йæ хабарæй дæр адæм тæрсгæ кодтой.
Йæ уыцы æрыгон бонты æнкъарæнтæ абоны хуызæн хъуыды кæны Артур. Абон дæр арфæйаг у æнæнхъæлæджы йын йæ цард чи фервæзын кодта, уыцы прапорщиккæй.
Уæвгæ Æрæфы районæй Афганистаны цауты архайынмæ, алы азты, æрвыст æрцыд 25 адæймаджы. Æрæфы районы Хæстон æфсымæрады хайады сæргълæууæг Малиты Оледжы ныхæстмæ гæсгæ иу дзы нал сæздæхт йæ фыдыуæзæгмæ, иннæтæ ссардтой сæ хæдзæрттæ.
Олег йæхæдæг дæр æфсады рæнхъытæ Афгæнистаны баххæст кодта ЦИПУ-йы дыккаг курсы фæстæ -20 аздзыдæй.
Олег æмæ Артуры ныхæстæм гæсгæ сын хъару æмæ ныфс лæвæрттой цæголты Кимы хъæбатæрдзинæдты хабæрттæ.
Уыцы рæстæг Советон Цæдисы цæрджыты хæлар цард, стыр æххуыс уыд æрыгон æфсæддонтæн кæрæдзийы æмбарынæн.
Афганистаны цаутæ стыр зындзинæдтæ бавзарын кодтой Советон цæдисы экономикæйæн, фæлæ уымæй сæйрагдæр уыд бирæ адæм дзы кæй фесæфт. “Груз 200” кæй хуыдтой, уый арæхæй арæхдæр æрвыст цыд фыдыбæстæмæ. Æмæ уыцы хъуыддæгтæм æркæсгæйæ, хаст æрцыд фæндон уырдыгæй ракæнын Советон Цæдисы æппæт æфсæдтæ дæр. Цалдæр къæпхæнæй конд цыдысты, моджæхедтай, уыцы хъуыддаг æнцон гæнæн кæм уыд. Уымæ гæсгæ азмæ хæстæг цыд, уыцы операци фæци 15 февралы 1989 анзы. Олег æмæ Артуры хъуыдытæй та куыд бамбæрстон, афтæмæй сæ æмфæсдтонтимæ фемблгæйæ кæд уыцы рæстæджы кой кæнын нæ уарзынц, уæддæр сæ буары æмæ уды уæды хъæдгæмттæ та цæргæбонты дæр семæ уыдзысты.
