30 азы размæ æвирхъауæй йæ цард аскъуыд фæндаггон фыдбылызы
Абон 85 азы сæххæст уыдаид Уæрæсейы сгуыхт артист, Цæгат Ирыстоны адæмон артист Суанты Кимыл. 30 азы размæ æвирхъауæй йæ цард аскъуыд фæндаггон фыдбылызы. Йе сфæлдыстадон фæндаг райдыдта скъолайы вокалон къорды архайдæй. Уый фæстæ каст фæцис Орджоникидзейы аивæдты училищæ. Æфсады службæйы фæстæ бацыд Саратовы консерваторимæ. Зындгонд тенор зарыд ирон æвзагыл Фыдыбæстæмæ æмæ адæммæ уарзондзинадыл. Сæрмагонд бынат йæ репертуары ахстой уæрæсейаг æмæ дунеон музыкæйы классикон æмæ нырыккон уацмыстæ дæр.1993-æм азы сæххæст Суанты Кимы бæллиц – йæ хъæппæрисæй арæзт æрцыд профессионалон эстрадон оркестр. Абон хæссы йæ ном. Хицæн ныхасы аккаг сты, кинонывты цы сурæттæ сарæзта, уыдон дæр. Адæмæн уарзон артист, æгæрон курдиаты хицау, Суанты Ким абон дæр цæры йæ зарджыты, йе сфæлдыстады.
