Цал æмæ цал адæймагæн бауарзын кодта Ирыстон, уый зын зæгъæн у
Абон 90 азы æххæст кæны, зындгонд бæстæзонæг, историк Плиты Таймуразы райгуырдыл. Цал æмæ цал адæймагæн бауарзын кодта Ирыстон, уый зын зæгъæн у. Æмæ уымæн æндæр уæвæн дæр нæ уыд. Таймуразы хъысмæт сбæрæг суанг йæ сабибонтæй фæстæмæ. Йæ фыд уыд кадæггæнæг, иттæг хорз зыдта ирон фольклор. Йæ мад дæр уыд кадджын бинонтæй рацæугæ. Таймураз йæхæдæг куыд дзырдта, афтæмæй ахæм ныййарджыты кæстæр уæвын уыд бæрнон хъуыддаг. Райгуырæн зæхмæ уарзондзинад уыд йæ царды стырдæр хъуыддаг. Йæ ном айхъуыст, студент ма куы уыди, уыцы рæстæг. Зындгонд профессортæ æмæ ахуыргæндтæ-иу æвæстиатæй раиртæстой Таймуразы зонадон курдиат. Зын бауырнæн у, фæлæ уал раздæр хохаг лæппу ахуыр кæнынмæ бацыд физкультурæйы хъомылады факультетмæ, суанг ма йæм ис акробатикæйы спорты мастеры ном. Æфсады службæйы фæстæ райдыдта, йæ фыд ын кæй дзырдта, уыцы таурæгътæ фыссын. Куыд дарддæр, афтæ фылдæр. Плиты Таймураз Цæгат Кавказы хæхты зыдта алы æфцæг дæр. Æнцон фæндæгтыл нæ фæцыди, фæлæ йын сæйрагдæр уыд æрдзмæ уарзондзинад æмæ йæ истори бахъахъхъæнын. Таймураз бирæ азты фæкуыста республикæйы Национ музейы. Бантыст ын бирæ цымыдисаг цаутæ сæмбырд кæнын. Куыд дзырдта, афтæмæй Ирыстоны нырма ис бирæ сусæг хабæрттæ, æмæ сæ æнæмæнг хъæуы иртасын.
