Ацы аз форумы темæ у «Медиапоток: факты и фейки. Формирование конструктивной информационной повестки»
Абон æмæ райсом Цæгат Ирыстоны ацæудзæн II медиафорум «PRO Кавказ». Ацы аз форумы темæ у «Медиапоток: факты и фейки. Формирование конструктивной информационной повестки». Мадзалы архайдзысты уазджытæ Белоруссийæ, Сомихæй æмæ Хуссар Ирыстонæй. Форумы фæз сæмбырд кæндзæн журналистты, блогерты æмæ чиныгуазджыты Цæгат Кавказы æппæт регионтæй, Мæскуыйæ æмæ Дард Скæсæнæй. Программæмæ хаст æрцæудзысты ахуырадон тректæ, фембæлдтытæ, дискусситæ. Спикерты хсæн ма уыдзысты зындгонд журналисттæ, амонджытæ, медиакъабазы эксперттæ: Евгений Попов, Александр Смол, Иван Сухов, Николай Яковлев æмæ бирæ æндæртæ. Уымæй дарддæр политологтæ – Александр Искандарян Ереванæй æмæ Мария Петрашко Минскæй. Ацы аз дæр форумы фæлгæты арæзт æрцæудзæн конкурс. Архайыны фадат дзы ис Цæгат Кавказы Федералон зылды æппæт регионтæй æмæ Хуссар Ирыстонæй журналисттæн. Конкурс цæудзæн 10 номинацимæ гæсгæ. Уæлахиздзаутæн лæвæрд цæудзæн æхцайы преми 50 мин сомы æмæ статуэткæ. Уæлахиздзаутæн кад кæндзысты форум сæхгæныны бон 13-æм июлы. Уæ зæрдыл уын æрлæууын кæндзыстæм, медиафорум арæзт цæуы Цæгат Ирыстоны сæргълæууæг Сергей Меняйлойы хъæппæрисæй. «PRO Кавказ» у регионты хсæн нырыккон ахуырадон фæз журналисттæн, блогертæн æмæ PR-специалисттæн. Йæ сæйраг нысан – медиатыгъдад нырыккон нымæцон хуызтæм раивын, æмæ аудитори парахат кæнын.
