филиал вгтрк государственная телерадиовещательная компания “Алания”

Æмбырд амыдта Хицауады сæрдар Такъоты Сергей. Фидаргонд æрцыд зынгсирвæзтытæй хъахъхъæнынмæ арæзт программæ 2013-2017-æм азтæн. Ахæм фыдбылызтæ нæ республикæйы арæх цæуынц. Афтæ 2007-æм азæй 2011-æм азы онг Ирыстоны æрцыд 2040 зынгсирвæзты, уыдоны фæмардысты 72 адæймаджы, хъыгдард та баййæфтой 214. Ног программæйы снысан кодтой мадзæлттæ, цæмæй, æхсæнадон кусæндæттæ, бирæ адæм кæм æмбырд кæны, уыдон хуыздæр хъахъхъæд уой зынгсирвæзтытæй, стæй цæмæй адæмы фылдæр ахуыр кæной æвирхъау цауты раст архайыныл. Хаст æрцыд уынаффæ, цæмæй ахуырдзаутæн ахуыры азы дæргъы, нæ республикæйы алы рæттæм цæугæйæ, æфсæнвæндаджы транспортæй пайда кæнæн уа льготæтæм гæсгæ. Раздæры программæйæн йæ æмгъуыд кæй фæци, уымæ гæсгæ сфидар кодтой ног программæ «Ирон æвзаг» 2013-2015-æм азтæн. Такъоты Сергей раарфæ кодта ахуыргæндтæн, ахæм ахсджиаг æмæ мидисджын документыл кæй бакуыстой, уый тыххæй, стæй бахæс кодта, цæмæй дихгонд æрцæуой фæрæзтæ ирон æвзаджы ахуыргæнджытæн уæлæмхасæн фиддонтæн. Программæйы цы мадзæлттæ снысан кодтой, уыдоны фæрцы хъуамæ бæрзонддæр кæна ирон æвзаджы кад æхсæнады.

Хъамболты Тамерлан, профессор, программæйы автор: «Раздæры программæйы цы хъуыддæгтæ райдыдтам, уыдонæн сæ фылдæр кæронмæ конд не ‘рцыдысты. Бирæтæ дзы дарддæр ахæццæ кæндзыстæм, цæмæй сæ ацы 3 азы кæронмæ фæуæм. Ног чингуытæ хъуамæ рауадзæм мыхуыры. Ирон æвзаг чи зоны, уыцы сывæллæттæн чингуытæ нæма рауагътам. Фылдæр нæ фæнды, цæмæй ног информацион технологитæй пайда кæнын райдайæм ирон æвзагыл, саразæм электрон тæлмацгæнæнтæ».