Мадзал аразынц хъæууонхæдзарады кусæджы боны кадæн. Равдысты се нтыстдзинæдтæ равæрдзысты цæгатирыстойнаг зæхкусджытæ дæр.
Ацы къуыри Мæскуыйы цæуы хъæууон хæдзарады армукъа «Сызгъæрин фæззæг -2019». Уым нæ бæстæйы зæхкуысджытæ æвдисынц сæ фæллойы бæркад. Хъæздыг хуын аласта нæ республикæ дæр. Спаржæ, æхсыры продукци, халсартæ, дыргътæ æмæ бирæ æндæр продукци. Цæмæй фæцыдысты цæгатирыстойнаг тæрхæджытæ уазджыты зæрдæмæ, уый тыххæй радзурдзæн Моргуаты Ладæ.
Сызгъæрин фæззæджы армукъайы уазджыты дисы бафтыдта ирыстойнаг спаржа. Инвестицион проект республикæйы æххæстгонд цæуы 2-аг аз. Спаржæ зайын кæнынц Æрхонкæйы фермерон хæдзарады.
Афæдзæй – афæдзмæ фæзуат кæны уæрæхдæр, фидæны аз нысан кæнынц 140 гектары ныссадзын. 100 гектары фæзуаты та бындур сæвæрдзысты талатæн. Пайда сæ кæндзысты куыд республикæйы, афтæ Уæрæсейы регионты дæр. Иу ногдзинад ма ис Цæгат Ирыстоны хъæууонхæдзарадон къабазы – райдыдтам æхсæры куыст дæр, уимæ æмгуыстад кæнæм Италиимæ.
Цæгат Ирыстоны стенды ма равæрдтой нæ республикæйы агропромышленнон комплексы алыхуызон продукци: халсартæ, дыргътæ, дзидзайы алы хуызтæ, мыд, æхсыры æмæ консервты продукци, адджинæгтæ, ирон уæливыхтæ, адджын дæттæ, сæлдæг, къозотæ, æйчытæ, мыггæгтæ. Уымæй уæлдай дзы базонæн уыд царды чи рацыд, кæнæ хæстæгдæр рæстæг чи рацæудзæн, уыцы фыццаградон инвестицион проектты, стæй хæххон территориты райрæзты программæты тыххæй. Нæ бæстæйы хицауады сæрдар Дмитрий Медведев йæ æргом аздæхта бынæттон картофы хуызмæ.
Федералон хицауад ма йæ æргом аздæхта кæсагахсæн куыстмæ. Фæстаг азты ацы къабазмæ фылдæр æргом здæхт цæуы.
Республикæйы сæргълæууæг куыд загъта, афтæмæй ахæм армукъатæ хорз фæрæз сты кæрæдзийы фæлтæрдзинадимæ зонгæ кæнынæн æмæ ссарын æмгуыстадгæнджыты.
Йæ разныхасы Дмитрий Медведев радзырдта агропромышленнон комплексы райрæзтæн цы æххуыс цæуы, уый тыххæй. Æмæ зæрдæ бавæрдта паддзахад алывæрсыг æххуыс кæй кæндзæн, цæмæй хъæууон хæдзарады бæрæггæннæтæ кæной фылдæр куыд бынæттон, афтæ фæсарæйнаг базарады дæр
Сызгъæрин фæззæджы армукъа цæудзæн 13-æм октябрьмæ. Йæ фæлгæты арæзт цæудзысты тымбыл стъолтæ, форумтæ, стæй къабазы райрæзты ахсджиаг фарстаты фæдыл æмбырдтæ.
