Республикæйы разамонæг премьер-министрæн фехъусын кодта, Цæгат Ирыстон кæй архайы 50 федералон проекты.
Абон Мæскуыйы уыд Уæрæсейы хицауады сæрдар Дмитрий Медведевы æмæ Цæгат Ирыстоны сæргълæууæг Битарты Вчеславы кусæг фембæлд.
Республикæйы разамонæг премьер-министрæн фехъусын кодта, Цæгат Ирыстон кæй архайы 50 федералон проекты. Æдæппæтæй та сты 67. Иууылдæр баст сты национ проекттимæ. Ацы аз бæлвырд мадзæлттæ царды рауадзынæн нæ республикæйæн радих кæндзысты 6 миллиарды æмæ 450 милуан сомы. Уыдонæй федералон бюджетæй – 5 миллиарды æмæ 920 милуан сомы, стæй 530 милуаны та республикон бюджетæй. Национ проекттæ фадат радтой бирæ фарстатæ алыг кæнынæн. Цæгат Ирыстоны фæфылдæр сты æнæниздзинадхъахъхъæнынады, чысыл æмæ астæуккаг бизнесы æмæ экологийы къабазы рæзты фæрæзтæ. Фæлæ уыимæ рæзы бæрнондзинад дæр, загъта Битарты Вячеслав. 2024-æм азы рацарæзты пъланмæ бахастой автомобилон фæндаг «Кавказ – Хурыхъæу – Малгобек – Мæздæджы» проект дæр. Ацы фæндаг хаудзæн 3-аг категоримæ, æмæ арæзт æрцæудзæн бындурон æрмæгæй. Республикæйы разамонæг Уæрæсейы премьер-министрæн зæрдæ бавæрдта, федералон бюджетæй цы фæрæзтæ радих кæндзысты, уыдонæй афоныл æмæ ахадгæйæ кæй спайда кæндзысты. Битарты Вячеслав ма Дмитрий Медведевæн радзырдта иннæ ахсджиаг фарстайы тыххæй, ома ламидæттæй тæссаг рæтты чи цæры, уыдоны æдас ранмæ ривын. Фарста алыг кæнынæн хъæуы 700 милуан сомы. Афтæмæй баххуыс кæндзысты 3 мин адæймагæн. Скъолаты бындурон цалцæгæн, æмæ сæ нырыккон кусæнгæрзтæй сифтонг кæнынæн бахъæудзæн 2 миллиарды æмæ 500 милуан сомы. Уымæй дарддæр ма республикæйы разамонæг ракурдта, цæмæй хицауады сæрдар баххуыс кæна, Беслæны теракты хъыгдард чи баййæфта, уыцы фæсивæдæн уæлдæр ахуыргæнæндæттæм квотæтæ самал кæныны хъуыддаджы.
