Хатдзæгтæ скодтой, ивгъуыд азы республикон бюджет куыд æххæстгонд æрцыд, уымæн. Финансты министр Наталья Царева куыд радзырдта, афтæмæй æфтиæгты хайæн сæххæст кодтой йæ 99%, хæрдзты хайæн та – 91%. Дефицит рауад 1миллиард æмæ 720 милуан сомæй фылдæр.
Каст цыд, 2015 азы нæ республикæйы фæцæрынæн пенсиисæгæн æппын къаддæр цас бахъæудзæн уыцы бæрцмæ, уыдзæн 6351 сом. Хъуамæ фидаргонд æрцæуа закъонæй, уый та хъæуы, цæмæй паддзахад банымайа пенсимæ уæлæмхасæн социалон фиддонты бæрц.
Фæллой æмæ социалон рæзты министрад куыд банымадта, афтæмæй ацы азы 1 кварталы нæ республикæйы фæцæрынæн æппын къаддæр рæстæмбис нымадæй бахъуыд 6мины æмæ 734 сомы. Уыимæ куыстхъом адæймагæн – 7мины æмæ 162 сомы, пенсиисæгæн – 5мины æмæ 489 сомы, сывæллонæн та – 6мины æмæ 741 сом. Хицауад ма æркаст, ивгъуыд рæстæг куыд ацыд, уымæ стæй снысан кодта мадзæлттæ фидæны зымæгмæ бацæттæ кæнынæн.
