Равдыст баст у сылгоймæгты Æппæтдунеон бонимæ
Абон республикæйы Национ музейы байгом уыдзæн равдыст «От кобанки к горянке». Равдыст баст у сылгоймæгты Æппæтдунеон бонимæ. Цы экспонаттæ йæм бацæттæ кодтой, уыдон ирд æвдисæг сты ирыстойнаг сылгоймæгты модæйæн, суанг хъобайнаг культурæйæ райдайгæйæ. Аивадуарзджытæн фадат уыдзæн хъобайнаг культурæйы артефакттæ, хуызистытæ, уæлæдарæс, аивгæнæнтæ, мигæнæнтæ æмæ æндæр æрмæджытæ фенынæн. Æдæппæтæй равдыстмæ хаст æрцыд 70 экспонаты. Сæ фылдæр сты Национ музейы исбон. Кæцыдæртæ адæм фендзысты фыццаг хатт. Иуæй-иу экспонаттæ та ист æрцыдысты Тугъанты Махарбеджы номыл музейæ. Экспозицимæ цы нывтæ бацæттæ кодтой, уыдоны автортæ сты Дзанайты Азанбеджы номыл аивадон училищæйы студенттæ. Равдыст фенæн уыдзæн 25-æм мартъийы онг.
