Бæрæгбонæн ис рагон истори
Абон сæ профессионалон бон бæрæг кæнынц слестгæнджытæ. Бæрæгбонæн ис рагон истори. Ацы бон 1713-æм азы Петр 1-æм расидти слестгæнæн канцеляри саразыны тыххæй Указ. Уый хынцгæйæ, 2014-æм азæй фæстæмæ бæрæггонд цæуы слестгæнæн оргæнты кусджыты бон. Профессионалон бæрæгбонæн ис стыр ахадындзинад. 300 азы дæргъы бæтты ивгъуыды æмæ нырыккон слестгæнæн оргæнты традицитæ.
Хъыгдардбаййафæджы æрфæрсын – уый у уæззау æмæ лæмбынæг куысты тæккæ райдиан. Афтæ иу къахдзæф иннæйы фæдыл кæнгæйæ, иу рæнхъ иннæйы фæстæ фысгæйæ, слестгæнæг бахæццæ вæййы рæстдзинадмæ. Дзæуджыхъæуы Ирыстойнаг районты хсæн слестгæнæн хайады æнæрлæугæ куыст цæуы фыдракæндтæ иртасыны фæдыл.
Фæлтæрдджын специалистты фарсмæ сты æрыгон кусджытæ. Нырма уал ацы дæсныйады кæнынц фыццаг къахдзæфтæ. Фæлæ ныридæгæн дæр сæ профессионалон архайд бæрæг дары. Уымæн æмæ бæлвырд æмбарынц сæ бæрнондзинад – слестгæнæджы куысты рæдыдæн бар нæй.
Ног технологитæ парахат кæныны хъуыддаджы криминалистикæйы службæ у раззагдæртæй иу. Сæ ахсджиагдæр хæс – ивгъуыд азты фыдракæндтæ раргом кæнын. Райдай 70-йæм азтæй, æмæ абоны онг. Уыимæ зæгъын хъæуы уый, æмæ ныртæккæйы гæнæнтæ сты æнцонархайд. Уый та фадат дæтты закъонхæлд бæстондæр æмæ бæлвырддæр раиртасынæн.
Слестгæнджытæн æнæмæнг у хæцæнгарзæй æхсыны практикæ. Уымæн æмæ специалисттæ хъуамæ цæттæ уой цыфæнды уавæртæм дæр.
Бирæтæн сæ сабибонты бæллиц вæййы – фидæны мидхъуыддæгты оргæнты кусын. Кадеттæм та уыцы бæллиц иу къахдзæф фæхæстæгдæр. Ныртæккæ нæ республикæйы байгом кодтой Слестгæнæн комитеты цыппар кадетон къласы. Лæппутæ æмæ чызджытæ зæгъынц – уым ахуыр кæнгæйæ сын хæссы сæрбæрзонддзинад æмæ уыимæ бæрнондзинад дæр.
Фæлтæрдджын слестгæнджытимæ кадеттæ бабæрæг кæнынц хæсты æмæ фронты фæсчъылдымы ветеранты. Хистæртæн кад кæнын – рæзгæ фæлтæрæн у ахсджиаг хъомыладон мадæзлттæй иу. Сæ бардзырды ахæм рæнхъытæ хуымæтæджы не сты. Ома йæхи дæнцæгæй иннæтæн раст фæтк æвдисын – службæйы дæр æмæ æрвылбоны царды дæр. Закъон хъахъхъæнгæйæ лæггад кæнынц Фыдыбæстæйæн.
