Уый кадæн Ирыстоны ацы аз нысангонд æрцыди Къостайы азыл. Юбилейы фæдыл Дзæуджыхъæуы æмæ республикæйы районты райсомæй фæстæмæ цæуынц бæрæгбоны мадзæлттæ.
Абон Цæгат æмæ Хуссар Ирыстоны цæрджытæ бæрæг кæнынц ирон литературæйы бындурæвæрæг, поэт, публицист, драматург, Ирыстоны фыццаг профессионалон нывгæнæг Хетæгкаты Къостайы 160 азы. Поэты юбилейы бон бирæтæ ацыдысты Нармæ. Ам райгуырд, Ирыстонæн стыр хæрзты чи бацыди, уыцы Къоста. Нары бацæттæ кодтой стыр фольклорон бæрæгбон. Æмæ æрмæст уый нæ, равæрдтой дзы Уæрæсейы Хуссар хайы нывгæнджыты симпозиум, хохаг адæмы цардархайды кусæнгæрзтæ, стæй алы æвзæгтыл Къостайы чингуыты презентаци. Бæрæгбонмæ се вæрæн бахастой нæ республикæйы зындгонд артисттæ дæр.
Ирыстоны ирддæр стъалыйы 160 азы боны кадæн Ирыстоны ацы аз нысангонд æрцыди Къостайы азыл. Дзæуджыхъæуы æмæ республикæйы районты райсомæй фæстæмæ цæуынц бæрæгбоны мадзæлттæ. Абон кæмфæндыдæр хъусынц Къостайы æнæмæлгæ рæнхъытæ, æмæ йæ цардвæндагæй ист скъуыддзæгтæ. Традицимæ гæсгæ, номарæн мадзалттæ райдыдтой Ирон аргъуаны кæрты. Уый фæстæ та уыд поэтикон марафон. Хетæгкаты Къостайы ингæны цурмæ æрбацыди сæдæгай адæмтæ. Дины кусджытæ дзы скодтой номарæн аргъуыд. Скъоладзаутæ, студенттæ, ирон интеллигенцийы минæвæрттæ бакастысты Къостайы æмдзæвгæтæ. Уый фæстæ йын йæ ингæныл сæвæрдтой дидинджытæ. Номарæн мадзæлттæ уыдысты театралон фæзы дæр. Нæ республикæйы зындгонд артисттæ бакастысты поэты æнæмæлгæ рæнхъытæ.
Абон бирæтæ сæ хæсыл банымадтой Къостайы райгуырæн хъæу – Нармæ ацæуын. Ирыстонæн стыр хæрзты чи бацыд, уыцы номдзыд хъæбулы кадæн дзы бацæттæ кодтой стыр фольклорон бæрæгбон. Æмæ æрмæст уый нæ. Уыдис дзы Уæрæсейы Хуссар хайы нывгæнджыты симпозиум, равæрдтой хохаг адæмы цардархайды кусæнгæрзтæ, стæй алы æвзæгтыл фыст Къостайы чингуыты презентаци. Бæрæгбонмæ се вæрæн бахастой нæ республикæйы зындгонд артисттæ дæр. Бæхты театр «Нартæ» равдыстой поэты номимæ баст спектакль. Нармæ æрбацыдысты Цæгат æмæ Хуссар Ирыстоны разамонджытæ Битарты Вячеслав æмæ Бибылты Анатолий, стæй Цæгат Кавказы республикæтæй уазджытæ. Хъуыстгонд поэты номыл бæрæгбон арæзт æрцыд Хуссар Ирыстоны дæр.
Куыд æцæг ирон лæг, афтæ Къоста адæмæн лæвæрдта ныфс æмæ хъару. Азтæ цæуынц, æмæ йæ не ппæт дæр æмбарæм, рухстауæджы курдиат куыд ирдæй зыны æмæ парахат кæны, уый. Уымæ гæсгæ абон махæн Хетæгкаты Къоста у мингай хатты зынаргъдæр æмæ ирддæр стъалы.
