Нымад у музейты кусджыты, стæй культурæ æмæ аивадæн аргъ чи кæны, уыцы адæмы профессионалон бæрæгбоныл
Абон у Музейты дунеон бон. Нымад у музейты кусджыты, стæй культурæ æмæ аивадæн аргъ чи кæны, уыцы адæмы профессионалон бæрæгбоныл. Ацы аз нæ бæстæйы музейты бон сбæрæг кæндзысты 47 хатт. Æрвылаз бæрæгбонмæ бацæттæ кæнынц ног равдыстытæ, тематикон фестивальтæ, лекцитæ, театралон равдыстытæ æмæ æндæртæ. Цæгат Ирыстоны рагон азты хæзнадоныл нымад цæуы Национ музей. Байгом ис 1893 азы. Йæ коллекциты ис, æмбал кæмæн нæй, ахæм археологон экспонаттæ, кавказаг æмæ скæсæйнаг хæцæнгарз æмæ къамты хъæздыг фонд. Музейты боны кадæн нæ республикæйы сараздзысты музейты æхсæв. Архайдзысты дзы национ музей æмæ йæ филиалтæ, театралон аивады музей æмæ республикæйы музыкалон музейтæ. Сабаты, театралон аивады музейы байгом уыдзæис равдыст «Маэстро мира». Аразынц æй Гергиты Валерийы æвдай азы юбилейы кадæн. Уыцы бон равдисдзысты Æрыдоны сывæллæтты аивæдты скъолайы ахуырдзауты равдыст «Нарты фæткъуы». Изæрæй та уазджыты хонынц театралон равдыст «Один вечер из жизни М.Булгакова во Владикавказе», стæй Ирыстоны аивад æмæ культурæйы тыххæй кинонывмæ.
