Фидаргонд æрцыд 2005-æм азы. Йæ нысан у, адæмы ргом ацы тæссаг низмæ раздахын. Статистикæйы бæрæггæнтæм гæсгæ, æрвылаз нæ бæстæйы онкологон низ разыны 4-5-сæдæ адæймагмæ.
Йæ уарзон жираффæ Давидикы Тулойты Георгий нæ дæтты йæ фыдмæ дæр. Хъазæн схуыдта йæ хуыздæр æмбалы номæй. Йемæ-иу цыдис рæвдауæндонмæ. Ныр афæдзы бæрц Георгий уым нал вæййы. 2 азы æмæ йыл æрдæг куы цыдис, уæд æм рабæрæг уæззау низ – лейкоз. 8 мæйы бæрц æй квотæмæ гæсгæ дзæбæх кодтой Дмитрий Рогачевы номыл сывæллæтты гематологийы æмæ онкологийы федералон центры. Скодтой йын химиотерапийы курсытæ. Ныр æй 6 къуыримæ рарвыстой сæхимæ. Мартъийы та бинонты ногæй хъæудзæн Мæскуымæ ацæуын.
Тулойты Зæлинæ, Георгийы мад: «Тыхтæ дæр æм фæзындис, хъæлдзæг у, хъазгæ кæны. Гыццыл фендæрхуызон ис. Сывæллæттæм йхи нал `ргом кæны. Фæлæ уый дæр ацæудзæн. Нырма уал хорз стæм, дарддæр бæрæг уыдзæн. Химитæн йæ фæстиуджытæ алыхуызон вæййынц. Махæн нæ къæхтæм расайдта. Бамбарын кодтой, кальци стджытæй цæуын кæй райдайы. Фыццаг, йæ рахиз къах уыд, ныр та йæ галиу къахыл къуылых цæуы. Афтæ загътой нын, зæгъгæ, химитæ куы нал кæнат, уæд æрдзæбæх уыдзæн».
Алы къуыри дæр Георгий фæдæтты туджы анализ. Уымæ гæсгæ йын снысан кæнынц, пуринетол æмæ метотрексат ын цас дæттын хъæуы, уый. Афтæ сывæллоны дзæбæх кæнын хъæуы æппын къаддæр 2 азы. Хостæ сты тынг зынаргъ. Сæ балхæнынæн бинонтæм фаг фæрæзтæ нал ис. Æххуыс сын кæнынц адæм. Пуринетолæй сæ сæххæст кодта иу зæрдæхæлар адæймаг, метотрексат æмæ иннæ хъæугæ препараттæ балхæнынæй та сын зæрдæ бавæрдтой Русфонды.
Тулойты Зæлинæ, Георгийы мад: «Зын у. Инвалидность нырма не скодтон, ныртæккæ ууыл архайын. Рынчындоны куы уыдыстæм, уæд нæ бон нæ уыд. Ныр гыццыл кæд фенцон уаид, йæхи пенси йын куы скæнон, уæд гыццыл фаг кæниккам».
Георгийæн æмæ иннæ рынчын сывæллæттæн баххуыс кæнын кæй фæнды, уыдонæн сæ бон у арвитын дзырд «дети» номыр 5541-мæ. Смс-хъусынгæнинаджы аргъ у 75 сомы.
