Адæмы фидæн аразгæ у йе ‘взаг æмæ йæ традицитæй. Уыдон бахъахъхъæнын та æнцон нæу. Хъуамæ алы адæймаг дæр йæ æрвылбоны царды хъуыды кæна уыцы хæсыл. Ууыл кусынц дзыллон информацион фæрæзтæ дæр
Адæмы фидæн аразгæ у йе ‘взаг æмæ йæ
традицитæй. Уыдон бахъахъхъæнын та æнцон нæу. Хъуамæ алы адæймаг дæр йæ
æрвылбоны царды хъуыды кæна уыцы хæсыл.
Ууыл кусынц дзыллон информацион фæрæзтæ дæр, уæлдайдæр мадæлон æвзагыл
фыст газеттæ æмæ журналтæ. Хъыгагæн, сæ фылдæры уавæр хорз нæу. Тæссаг
у, кæсæг сæ кæй нæй, уымæ гæсгæ æхгæд куы æрцæуой, уымæй.
Фыдæлты æгъдæуттæ, нæ разагъды
æмзæххонты нæмттæ, нæ мадæлон æвзаг ма ферох кæнын у газет «Дигорæ»-йы
кусджыты сæйраг хæс. Кæд йæ коллектив стыр нæу, уæддæр 16 фарсы байдзаг
кæнынц цымыдисаг æрмæджытæй. Бæргæ архайынц, фæлæ сæ куыстæй сæ зæрдæ нæ
райы.
Сакъити Эльбрус, газет «Дигорæ»-йы
сæйраг редактор: «Иу зонгæ зæронд лæг мын уыд. Цот ын уыд, фæлæ хъæуы
иунæгæй цард. Тынг лæмбынæг каст йæ цæхæрадонмæ, алцыдæр ын дзы зад.
Фæлæ хъаст кодта, алцыдæр дзы бæргæ кæй ис, фæлæ кæй никæй хъæуынц,
зæгъгæ. Мах дæр уыййау. Зæрдиагæй кусæм, фæлæ нæ кæсæг нæй. Ацы азы
æрдæгмæ газет рафыста 800 адæймаджы. Диссаг мæм кæсы, уымæй фылдæр кæй
никæй хъæуы,уый».
20 азы размæ Малиты Батраз газетæн
бындур куы сæвæрдта, уæд æрмæстдæр хъуыды кодта «Дигорæ»-йы рæсугъд
фидæныл. Адæмыл кæй никуы сиузæрдиуон уыдзысты æмæ рæстæгимæ
æмдзугæнгæйæ дзыллæтæн пайдайаг кæй уыдзысты. Баликъоты Сафарбийы
бинонтæ хорз хъуыды кæнынц газеты фыццаг номыртæ. Æхсызгон сын у, куыд
фæстæдæр, афтæ йæ хæрзхъæддзинад хуыздæрæй хуыздæр кæй кæны, уый.
Баликъоты Сафарби, фæллойы ветеран: «Æз
сæ хорз зонын. Редакцимæ уайгæ дæр бакæнын, газетмæ фысгæ дæр ныккæнын.
Уыцы гыццыл коллектив цы цымыдисаг æрмæджытæ æрæмбырд кæны, уый диссаг
у. Бакæсæн дзы ис куыд дыгуронау, афтæ иронау æмæ уырыссагау фыст
æрмæджытæ дæр. Тынг зæрдиагæй сæ бакæсæм, фенхъæлмæ кæсæм гезеты ног
номермæ».
Баликъоты Беллæ, ахуыргæнæг:
«Коллективæн нæ зæрдæ зæгъы ног æнтыстдзинæдтæ. Газеткæсæгмæ та мæ фæнды
фæсидын, афæдзмæ дзидза иу килограмм къаддар балхæнæнт æмæ сын фадат
уыдзæн газет рафыссынæн. Æхсæз мæйы «Дигорæ» куы исой, уæд фæхъæздыгдæр
уыдзæн сæ миддуне».
Газетæн аргъ чи кæны, æмæ йæ йæ бинонты
хайыл чи нымайы, ахæмтæ дæр ис. Уæлдай æхсызгон у кæстæр фæлтæры хсæн
дæр ахæмтæ кæй ис, уый.
Будайты Арават,журналист: «Мах кæд
горæты цæрæм, уæддæр исæм «Дигорæ». Æмбырд бинонтæй йæ кæсæм. Ахæм
газеты фæрцы бахъахъхъæндзыстæм нæ культурæ, не ‘взаг».
«Дигорæ»-йы сæйраг редактор куыд зæгъы,
афтæмæй сын паддзахад æххуыс кæны, фæлæ газеткæсæг та йæхиуыл йæхæдæг
хъуамæ басагъас кæна, йæ бæсты йын газет ничи рафысдзæн.
Сосранты Жаннæ
